АҚШ Федерал захира тизими (Фед) асосий ставкасини 50 базис пунктга ошириб, 4,25—4,50 фоизга етказди. Бу ҳақда «Дарё»га регулятор ҳисоботидан маълум бўлди.
Фед, шунингдек, 2022 йилда АҚШ ЯИМ ўсиши прогнозини 0,5 фоизга (илгари 0,2 фоизга прогноз қилинган) яхшилади. Мамлакатнинг 2023—2024 йилларга мўлжалланган ЯИМ ўсиши прогнозлари мос равишда 1,2 —1,7 фоиздан 0,5—1,6 фоизга ёмонлашди.
Маълумотларга кўра, максимал бандликни ва инфляцияни 2 фоиз даражасида қўллаб-қувватлаш учун қўмита федерал маблағлар ставкаси учун мақсадли диапазонни 4,25—4,50 фоизгача оширишга қарор қилди.
«Қўмита инфляцияни вақт ўтиши билан 2 фоизга қайтариш учун етарли даражада чекловчи пул-кредит сиёсатига эришишда мақсадли диапазондаги ўсишларнинг давом этишини кутмоқда», — дейилади ҳисоботда.
Мақсадли диапазонда келажакдаги ўсиш суръатларини белгилашда қўмита пул-кредит сиёсатининг қатъийлаштирилишини, унинг иқтисодий фаоллик ва инфляцияга таъсир қилишдаги кечикишларини, иқтисодий ва молиявий ўзгаришларни ҳисобга олади.
Сўнгги ойларда мамлакатда иш ўринлари сони сезиларли даражада ошди, ишсизлик даражаси пастлигича қолмоқда.
Инфляция юқорилигича қолмоқда, бу пандемия билан боғлиқ талаб ва таклиф номутаносиблигини, озиқ-овқат ва энергия нархларининг кўтарилишини ва кенгроқ нарх босимини акс эттиради.
Ноябрь ойидаги йиғилиш натижаларига кўра, ставка йилига 3,75—4 фоиз оралиғига олиб келинди. Ставканинг ўсиш босқичи 0,75 фоиз даражани ташкил этди — бу кетма-кет тўртинчи марта ўсиш.
Аввалроқ АҚШ Федерал резерв тизими кетма-кет учинчи марта базавий ставкани 0,75 фоизга оширгани ҳақида хабар берилганди.
Изоҳ (0)