Apple kompaniyasi foydalanuvchilarga iPhone va iPad qurilmalariga boshqa do‘konlardan ilovalarni o‘rnatishga ruxsat berishi mumkin, deb xabar bermoqda Bloomberg. Bungacha faqat App Store firma do‘konidan ilovalarni yuklab olib o‘rnatish mumkin edi.
Nashr ma’lumotlariga ko‘ra, yangilik Yevroittifoqning yaqin oylarda kuchga kiradigan “Raqamli bozorlar to‘g‘risida”gi qonunida ko‘zda tutilgan. Ushbu qonun, xususan, Apple va Google kabi kompaniyalar foydalanuvchilar uchun qurilmalar asosiy sozlamalaridan foydalanish hamda begona ilovalarni o‘rnatish imkoniyatini soddalashtirishi kerakligini nazarda tutadi.
Kompaniyalar qonunning barcha talablarini 2024-yilga qadar bajarishi shart bo‘lmasa-da, Bloomberg ma’lumotlariga ko‘ra, Apple zarur o‘zgarishlarni 2023-yildayoq iOS 17 yangilanmasi doirasida kiritishi mumkin.
O‘zgarishlar dastlab faqat Yevropa bozoriga taalluqli bo‘lishi kutilmoqda, biroq ekspertlar fikricha, keyinroq boshqa mamlakatlar ham xuddi shunday qonunlarni qabul qilishi mumkin.
Oktabr oxirida Apple Yevroittifoqning elektron qurilmalar quvvatlash portlarini unifikatsiyalash (bir xillashtirish) haqidagi qonuni doirasida o‘z qurilmalarini USB-C’ga o‘tkazishi ma’lum bo‘ldi. Bloomberg ma’lumotlari bo‘yicha, USB-C portiga ega birinchi iPhone 2023-yilda chiqariladi.
Avvalroq Facebook ijtimoiy tarmog‘i asoschisi Mark Sukerberg ilovalarni boshqarish bo‘yicha Apple siyosatini tanqid qilgan edi.
Mavzuga doir:
Izoh (0)