Германияда 23 минг киши давлат тўнтаришига уринишда гумонланмоқда

Германияда давлат тўнтаришида неча киши қатнашмоқчи бўлгани маълум қилинди. Бу ҳақдаги тафсилотлар Германия Ички ишлар вазирлиги сайтига жойланди.

Уларга кўра, мамлакатда давлат тўнтаришини режалаштиришга алоқадор деб гумон қилинаётган сиёсий гуруҳлар иштирокчилари сони 23 минг кишига етади. Уларни ягона ҳаракат деб атаб бўлмайди, лекин уларнинг барчасини экстремистик гуруҳлар деб ҳисоблаш мумкин.

«‘Рейх фуқаролари’ (Reichsbürger) ва ‘Ўз-ўзини бошқариш’ (Selbstverwalter) ўртасида, шунингдек, бу гуруҳларнинг ўзида ҳам ички мафкуравий ва бошқа зиддиятлар бор, уларнинг аъзолари кўпинча бир-бирига зид бўлган фитна назарияларига таянади. Шу туфайли уларнинг тарафдорларининг бир қисмини ўнг экстремизмга киритиш мумкин», — дейилади вазирлик хабарида.

Бироқ ИИВ қайд этишича, ушбу ҳаракатлар иштирокчилари сони барибир катта — 23 минг киши.

«Уларнинг қарийб 1250 нафари ўнг экстремистик фракцияларга алоқадор. Зўравонликка мақсадга эришиш усули сифатида қарайдиганлар тахминан 2100 кишини ташкил этади. Айни вақтда 500 кишида қонуний тарзда сотиб олинган қурол аниқланди», — дейилади идора сайтида.

Хавфсизлик кучлари фикрича, ҳукумат бу одамлар туғдириши мумкин бўлган хавфга жуда жиддий қараши керак, чунки улар «замонавий Германиянинг давлат сифатида мавжудлигини, шу жумладан, унинг ҳуқуқий тизимини рад этади».

«‘Рейхсбюргер’ гуруҳи, контрразведка даъво қилишича, 286 та қуролли гуруҳни тузишни режалаштирган, улар бутун мамлакат бўйлаб ички хавфсизлик учун жавоб бериши ва тозалашлар ўтказиши керак бўлган, уларни ҳатто қотилликлар ҳам тўхтата олмаслиги керак эди», — дейилади ИИВ хабарида.

Эслатиб ўтамиз, 7 декабрь куни Германияда мамлакат миқёсидаги энг йирик махсус операциялардан бири ўтказилди. Уч минг нафар полициячи 130 дан ортиқ уйларда, офисларда ва омборхоналарда тинтувлар олиб борди. Натижада 25 киши ҳибсга олинди, улар Германияда давлат тўнтаришини режалаштиришда гумонланмоқда, бундан ташқари, яна 27 нафар гумонланувчи ҳам бор.

Ушбу операция доирасида Германияда келиб чиқиши 700 йиллик Ройсс князлик оиласидан бўлган шаҳзода Генрих XIII ҳам ҳибсга олинди.