Эрон мудофаа вазири Муҳаммад-Ризо Аштианий Киев уруш пайтида Эрон қуролларидан фойдаланилаётгани ҳақида бирорта далил келтирмаганини даъво қилди. Россиянинг Эронда ишлаб чиқарилган дронлар билан Украинага зарба йўллаётгани ҳақида бир неча ойдан буён ғарб матбуоти ва расмийлари хабар бермоқда.
Эрон Мудофаа вазирлиги раҳбарининг айтишича, Украина ва Эрон ҳарбийлари ўртасида учрашув бўлиб ўтган, унда Украина томони Эроннинг Россияга дронлар етказиб бераётгани, улардан Украина шаҳарларига ҳужумда фойдаланилаётганини тасдиқловчи ҳеч қандай ҳужжат тақдим этмаган.
Муҳаммад-Ризо Аштианий Эрон ва Россия мудофаа соҳасидаги ҳамкорликни ривожлантираётганини тан олди, бироқ бу Украинадаги урушда фойдаланиш учун дронлар етказиб беришни ўз ичига олмаслигини таъкидлади.
Август ойида The Washington Post газетаси Россияга Эрон дронлари етказиб берилаётгани ҳақида ёзганди. Бунгача, июль ойида АҚШ маъмурияти Теҳроннинг Москвага бир неча юзлаб учувчисиз учоқларни, жумладан, қурол олиб юришга қодир дронларни топшириш режалари ҳақида маълумотга эга эканини билдирган.
Маълумотларга кўра, Россия Украинадаги урушда Эронда ишлаб чиқарилган Shahed-131 ва Shahed-136 дронларидан фойдаланмоқда, Россия Қуролли кучлари уларнинг номини «Геран-1» ва «Геран-2» деб ўзгартириб олган. Россия расмийлари дронларнинг Эрондан олиб келинишини тан олмаяпти.
Ноябрь ойи бошида Эрон ташқи ишлар вазири Ҳусайн Абдуллоҳиан Россияга бир қанча дронлар юборилганини тасдиқлаб, бу уруш бошланишидан бир неча ой олдин содир бўлганини айтди.
12 декабрь куни Американинг Урушни тадқиқ қилиш институти (ISW) ўзининг кунлик шарҳида ёзишича, Россия қўшинлари Украина ҳудудига зарбалар беришда Эрон дронларидан фаолроқ фойдалана бошлаган. ISW фикрича, Россия ҳарбийлари, катта эҳтимол билан, Эрондан дронларнинг янги партиясини олган ёки яқин кунларда уларнинг етказиб берилиши кутилмоқда.
Изоҳ (0)