Alla Pugachyova, Yelena Zelenskaya va eronlik namoyishchilar BBC’ning eng nufuzli ayollar ro‘yxatiga kirdi

BBC nashri yilning eng nufuzli 100 nafar ayolidan iborat ro‘yxat e’lon qildi. Unga uch nafar rossiyalik kirdi, bular — qo‘shiqchi Alla Pugachyova, rassom Sasha Skochilenko va “Xolod” nashri bosh muharriri Taisiya Bekbulatova.

Rassom Sasha Skochilenko aprelda Rossiya qurolli kuchlarining Ukrainadagi harakatlari haqida “yolg‘on ma’lumot tarqatishda ayblanib qo‘lga olingandi, u do‘konda mahsulotlarga narxko‘rsatkichlar o‘rniga urushga qarshi varaqalar joylashtirib chiqqan. U 10 yilgacha muddatga ozodlikdan mahrum etilishi mumkin. Amnesty International tashkiloti Skochilenkoni vijdon asirasi deb tan olgan.

Taisiya Bekbulatova esa Meduza nashrining sobiq maxsus muxbiridir.

BBC ro‘yxatiga, shuningdek, Ukrainaning sakkiz nafar vakili kirdi, ular orasida mamlakat birinchi xonimi Yelena Zelenskaya, Rossiyada asirlikda bo‘lib qaytgan paramedik Yuliya Payevskaya va nufuzli Filds mukofotini qo‘lga kiritgan matematik Marina Vyazovskaya bor.

Bundan tashqari, ro‘yxatdan Yevrokomissiya rahbari Ursula fon der Lyayyen, qo‘shiqchi Billi Aylish, aktrisa Priyanka Chopra-Jonas va o‘z sochlarini qirqib tashlayotgan ayol o‘rin oldi — u Eronda hijobni “noto‘g‘ri” o‘ragan qizning o‘limidan keyin boshlangan norozilik namoyishlari ishtirokchilarining umumiy timsolidir.

“Biz ismlari so‘nggi 12 oy ichida yangiliklar sarlavhalarida chiqqan yoki muhim voqealarga o‘z ta’sirini o‘tkazgan, shuningdek, yangiliklarda tilga olinmasa-da, boshqalar uchun ruhlantiruvchi hikoya bo‘la oladigan yoki ahamiyatli yutuqqa erishib, o‘z jamiyatiga qandaydir ta’sir o‘tkaza olgan nomzodlarni qidirdik”, — deya BBC ro‘yxat qahramonlari qanday tanlab olinganini tushuntirib berdi.

Mavzuga doir:

• Alla Pugachyova Rossiyadagi so‘nggi kompaniyasini yopish uchun ariza berdi
• Ukraina birinchi xonimi Yelena Zelenskaya Britaniya qiroli Charlz III bilan uchrashdi (foto)
• Eron hukumati namoyishlarda 300 dan ortiq odam halok bo‘lganini ma’lum qildi