Ukraina birinchi xonimi Yelena Zelenskaya Britaniya qiroli Charlz III bilan uchrashdi (foto)

Ukraina prezidenti rafiqasi Yelena Zelenskaya Buyuk Britaniya qiroli Charlz III bilan uchrashuv o‘tkazdi, bu haqda u o‘z Telegram-kanalida ma’lum qildi.

Zelenskaya va Charlz III Londondagi Ukraina yunon-katolik cherkoviga va uning hududida joylashgan ukrainalik qochqinlar uchun markazga tashrif buyurdi.

“Janobi oliylari Ukrainadan majburan ko‘chirib keltirilganlarni qo‘llab-quvvatlash uchun birinchi marta o‘z vaqti va iliq so‘zlarini ajratayotgani yo‘q: yaqinda u Shotlandiyada, undan avvalroq esa Ruminiyada ukrainalik qochqinlar bilan ko‘rishgandi”, — dedi Yelena Zelenskaya.

Ukrainaning birinchi xonimi ayni paytda rasmiy tashrif bilan Buyuk Britaniyada bo‘lib turibdi. Avvalroq u Charlz III ning rafiqasi, konsort qirolicha Kamilla bilan, shuningdek, Britaniya bosh vaziri Rishi Sunak va uning rafiqasi Ashkata Murti bilan uchrashgandi.

Britaniya bosh vazirlari Rishi Sunak va Boris Jonson Ukraina prezidenti Vladimir Zelenskiy bilan uchrashish uchun Kiyevga borgandi. Britaniya qiroli Charlz III bilan esa Ukraina yetakchisi hali ko‘rishganicha yo‘q — U Rossiya bilan to‘liq ko‘lamli urush boshlanganidan buyon mamlakatni tark etgani yo‘q.

Avvalroq Yelena Zelenskaya BBC’ga intervyu berib, Ukraina aholisining katta qismi Yevroittifoqqa a’zo bo‘lish uchun chiroqsiz va issiqlik ta’minotisiz yashashga tayyorligini aytgandi.

Mavzuga doir:

• Zelenskiyning rafiqasi BMT Bosh Assambleyasida bosh kotib bilan uchrashdi
• “Rossiya o‘ldirmoqda, Amerika qutqarmoqda” — Olena Zelenskaya AQSH Kongressida nutq so‘zlab, ko‘proq qurol so‘radi
• Ukraina birinchi xonimi Olena Zelenskaya AQSHga tashrif buyurdi (foto)