Tog‘lar va o‘rmonlar bilan o‘ralgan Mudurnu shahri Turkiyaning Bolu viloyati markazidan 52 km uzoqlikda joylashgan bo‘lib, o‘zining bir necha asrlik qadimiy maskanlari bilan sayyohlarni jalb qilib kelgan. “Daryo” muxbiri Turkiya madaniyat va turizm vazirligi tomonidan tashkil etilgan press-tur doirasida Mudurnu va Safarbolu shaharlarida bo‘lib, shahar ko‘chalarini kadrlarga muhrladi.
Shaharda Usmoniylar davrida qurilgan qasrlar saqlanib qolgan va shahar o‘ziga xos antik ruhini yo‘qotmagan. Bu tarixiy davrni his qilish imkonini beradi.
Mudurnu Buyuk ipak yo‘lida, Tabriz va Konstantinopolni bog‘lovchi yo‘lda joylashgan. Shuningdek, bu yerdan yana bir muhim savdo arteriyasi — Damashqdan Qrimgacha bo‘lgan yo‘nalish mavjud. Savdo yo‘llari chorrahasida joylashgan bu joy Mudurnani muhim savdo markaziga aylantirgan.
Mudurnuda jami 180 ga yaqin qadimiy bino saqlanib qolgan. Ularning ba’zilar hozir kichik mehmonxonalarga aylantirilgan.
2015-yilda Mudurnu ko‘p asrlar davomida o‘z an’analarini saqlab qolgan ustalar shahri sifatida YUNESKO ro‘yxatiga kiritilgan. Ular orasida 700 yildan ortiq vaqt davomida juma namozi o‘qib kelingan maxsus joy bor.
Shaharda yog‘ochdan yasalgan soat minorasi mavjud bo‘lib, u 1891-yilda qurilgan. Urushlar va boshqa sabablar bilan minora bir necha marta yondirilgan va qayta tiklangan. Oxirgi marotaba 1964-yilda rekonstruksiya qilingan. Minoraning o‘ng qismidagi tepada qadimgi qal’a xarobalari mavjud. Ular Mudurnaning yana-da qadimiy o‘tmishiga, Modrena deb atalgan va Vizantiyaning kichik bir qishlog‘i hisoblanadi. Imperator Yustinian uni shahar maqomiga ko‘targan bo‘lib, shundan keyin bu joy Yangi Justiniana deb atalgan. Asrlar davomida bu talaffuz Mudurnuga o‘zgargan.
Shaharda ikkita qadimiy masjid va bitta hammom bor. Sulton Boyazid birinchi nomi bilan ataluvchi masjud va hammom 1374-yilda Sultonning valiahd shahzodalik vaqtida qurib bitkazilgan. Hammom hali ham ishlamoqda. Ikkinchi masjid esa Sulton Sulaymon tomonidan 1546-yilda bunyod etilgan.
Bir zamonlar hayot qaynagan shahar bugunga kelib xiyla sokin tortgan. Ammo Mudurnudagi moziy nafasi kelib turgan ko‘chalar, fotihu jahongirlarni sajdaga bosh qo‘ydirgan masjidlar, qadimiy karvonsaroylar, qoyalar bag‘rida qurilgan muhtasham uylarni ko‘rib, o‘tmishdagi shon-shavkat yana qaytishiga ishongingiz keladi.
Izoh (0)