Ichki ishlar vaziri o‘rinbosari Bekmurod Abdullayev avtomobil yo‘llarining qancha qismi talabga javob bermasligini ma’lum qildi. Bu haqda O‘zA xabar berdi.
Qayd etilishicha, 2022-yilning yanvar—oktabr oylari davomida 7 ming 636 ta yo‘l transport hodisasi sodir etilgan. Shundan 1 ming 931 tasi o‘lim bilan yakun topgan. Aynan yo‘l infratuzilmasi to‘g‘ri tashkil etilmagani oqibatida 3 ming 980 ta yo‘l transport hodisasi sodir bo‘lgan. Yo‘llarning talabga javob bermasligi yo‘l-transport hodisalarining 52 foizini tashkil etadi.
“Bu kabi holatlar asosan piyodalar o‘tish yo‘lagining to‘g‘ri tashkil etilmagani, veloyo‘laklarning mavjud emasligi, yo‘lni ikkiga ajratuvchi to‘siqlar o‘rnatilmagani, yo‘llarning yoritilmagani, piyodalar harakatini cheklovchi to‘siqlar o‘rnatilmagani hamda yo‘lning o‘tkazuvchanligi transport oqimiga moslashtirmagani kabi sabablar tufayli yuzaga kelgan. Ko‘pgina hududlarda yer osti va yer usti piyodalar o‘tish joyi tashkil etilmagan”, — deydi Bekmurod Abdullayev.
Shuningdek, aynan inson omili bilan bog‘liq 3 ming 656 ta yo‘l transport hodisasi sodir etilgan. Bunda haydovchilarning belgilangan tezlikka rioya etmasligi, haydovchining tajribasizligi, piyodalarga yo‘l bermaslik, svetofor va yo‘l belgilariga rioya qilmaslik kabi holatlar ham sabab bo‘lgan.
Polkovnikning ta’kidlashicha, birorta yo‘l transport hodisasi yo jarohatsiz yoki o‘lim holatlarisiz tugamagan.
Izoh (0)