Самарқандда ўз погонини юлиб, аёлни қасддан айбдор қилмоқчи бўлган ИИБ ходими тизимда ишламоқда

Май ойида Самарқанд вилоятида ИИБ ходими погонини ўзи юлиб, бунда ёнидаги аёлни айблагани акс этган видео тарқалган эди. Тасвирларда ички ишлар ходими бир аёлни қўлидан тортиб, мажбурий тартибда олиб кетаётгани ва бу жараёнда ходим погонини ўзи юлиб олиб, қасддан аёлни айбдор қилишга урингани кўринган. Ушбу ҳолатни видеотасвирдан аниқ кўриш мумкин.

Бугун, 1 декабрь куни АОКАда бўлиб ўтган матбуот анжуманида журналистлар томонидан ўз погонини юлиб олиб, аёлни қасддан айбдор қилмоқчи бўлган ички ишлар ходими тизимда ишлаётгани савол остига олинди. Бу ҳақда «Дарё» мухбири хабар бермоқда.

Саволга ИИВ масъул ходими, майор Наврўз Набиев жавоб берар экан, погонини ўзи юлган ИИБ ходими тизимда ишлаётганини тасдиқлади.

«Ҳолат юзасидан прокуратура органлари томонида жиноят иши қўзғатилган. Ички ишлар органи ходими ва фуқароларнинг кўргазмаларида ўзаро зид маълумотлар бўлганлиги ва тергов жараёнида аниқланган бошқа кўрсатмалар ва аниқланган фактларга асосланиб, аёлга нисбатан Жиноят кодексининг 219-моддаси (ҳокимият вакили ёки фуқаролик бурчини бажарувчи шахсга қаршилик кўрсатиш) билан жиноят иши қўзғатилиб, бир йил ахлоқ тузатиш ишлари тайинланган», — деди Наврўз Набиев.

Масъул ходимнинг қўшимча қилишича, Самарқанд вилоят ички ишлар бошқармаси томонидан ўтказилган хизмат текшируви натижасида ходимнинг хатти-ҳаракатларига баҳо берилиб, прокуратура органи томонидан ҳуқуқий баҳо бериши бўйича ҳужжат тўлиқ юборилган. Натижада ходим ўз ишида қолган.

Бундан кўринадики, прокуратура ИИБ томонидан ўз ходимига нисбатан ўтказилган хизмат текшируви натижаларига эътироз билдирмаган. Яъни ўз погонини юлиб олган ходимнинг хатти-ҳаракатлари унинг тизимда ишлашига монелик қилмаслиги қонунчиликда қайд этилган бўлиши мумкин.

Анжуманда «Дарё» мухбири масъулларга агар ИИБ ходими ўз погонини қасддан юлиб ташласа, у тизимда ишлайдими, деган саволни берди.

Саволга ИИВ ахборот хизмати раҳбари Шоҳруҳ Ғиёсов жавоб берди:

«Агар ички ишлар ходими погонини қасддан юлиб ташласа, ички ишлар тизимида ишламайди. Жиноий жазо берилади, у ходимнинг руҳий ҳолати текширилади», — деди у.