Qozog‘istonda prokuratura talabi bilan Jahon sog‘liqni saqlash tashkiloti (JSST) sayti bloklandi. Bu haqda Digital Paradigm jamoat fondi direktori Yeljan Kabishevga tayanib, “Tengrinews” xabar berdi.
“Biroq tashkilot bildirishnoma olmagan. Tasavvur qiling, Talgar prokurori JSST saytiga kirish imkonsiz deb qaror qildi. Bu men uchun chegaradan o‘tish hisoblanadi”, — dedi Kabishev.
JSST sayti Qozog‘iston hududida ishlamayotgani haqida Facebook’da qozog‘istonlik foydalanuvchilar ma’lumot bergan. Sog‘liqni saqlash va tibbiyot sohasi mutaxassislari ham bu haqda xabar bermoqda. Sud tashkilot sayti bloklanganini tasdiqlagan. Jarayonni Olmaota viloyati Talgar tuman sudi sudyasi N.B.Sarsenboyev ko‘rib chiqqan.
Ta’kidlanishicha, Talgar tumani prokurori arizachi sifatida davlat manfaatlarini ko‘zlab ish tutgan. Sud qarori 2022-yil 14-oktabrda chiqarilgan. Prokuror JSST saytida o‘z joniga qasd qilish usullari haqida ma’lumotlar borligini sabab qilib ko‘rsatgan.
“Qozog‘istonda inson va uning hayoti eng oliy qadriyatlardan biri sifatida e’tirof etilishini hisobga olib, tarqatilayotgan internet-resurslarda insonni hayotdan mahrum qilish, joniga qasd qilish usullari haqida ma’lumotlar mavjudligi sababli prokurorning arizasi qanoatlantirildi”, deyiladi sud qarorida.
Izoh (0)