Oq uy Rossiya Ukrainada kimyoviy qurol qo‘llashi mumkinligidan xavotirda — Politico
AQSH Rossiyaning Ukrainaga qarshi kimyoviy qurol qo‘llashi mumkinligidan xavotirlanmoqda. Agar Rossiya qo‘shinlari o‘z pozitsiyalarini yo‘qotishda davom etsa, bu ssenariy yuz berishi mumkin deb xabar bermoqda Politico amerikalik amaldorlarga tayanib.
AQSH prezidenti Jo Bayden ma’muriyatining bir qancha mulozimlari Rossiya yadro qurolidan foydalanishga urinishdan oldin kimyoviy qurolga murojaat qilishi mumkin, deb hisoblamoqda.
Shu bilan birga, AQSHda hujum ehtimoli borligini ko‘rsatadigan birorta razvedka ma’lumotlari yo‘q. Ko‘plab rasmiylar Ukrainadagi jangovar harakatlar qishda to‘xtashiga ishonadi.
Biroq agar jang maydonida yo‘qotishlar davom etsa yoki Rossiya armiyasi butunlay qulasa, Kreml kimyoviy moddalardan foydalanishga urinishi mumkin, deb ta’kidladi ushbu masala ustida ish olib borayotgan rasmiylar.
“Siyosatchilar va mutaxassislarning ta’kidlashicha, Moskva bir vaqtning o‘zida bir yoki ikki kishiga qarshi ‘Novichok’ — nervlar falajiga olib keladigan zaharni qo‘llagani ma’lum bo‘lsa-da, ba’zi kimyoviy moddalar ommaviy qo‘llanishi mumkin. Misol uchun, ayrim moddalar aerozolga aylantirilishi yoki yirik guruhga zarar yetkazish uchun o‘q-dorilar bilan ishlatilishi mumkin”, — deyiladi gazeta xabarida.
AQSH anchadan buyon Rossiya kimyoviy qurol salohiyatiga sarmoya kiritayotganidan xabardor. Rasmiylar Kreml “jangning noan’anaviy usullari”ga murojaat qilishi mumkinligidan xavotirda.
Shu bilan birga, bunday xavotirlar Oq uyni ehtimoliy kimyoviy hujumni aniqlash va unga tayyorgarlik ko‘rish tizimini takomillashtirishga undamoqda.
