Toshkentning Mirzo Ulug‘bek tumanidagi IT park binosida 23-noyabr kuni yong‘in yuz bergani xabar qilingandi. Axborot texnologiyalari va kommunikatsiyalarini rivojlantirish vaziri Sherzod Shermatov holat yuzasidan munosabat bildirdi.
Bugun IT park kompleksida quruvchilarimiz oxiriga yetkazayotgan binoning tepasida ozgina penopleks tutatib yuborishgan ekan, juda ko‘p odamlar va OAV shuni muhokama qilishdi. Lekin asosiy Olov xabarlarimiz haqida hali ko‘pchilikka yetkazib berishga qiynalyapmiz.Uning so‘zlariga ko‘ra, hatto chet elliklar avvalgi “Tashkent — gorod xlebniy” degan gapni, “Tashkent — gorod aytishniy” degan maqolalar yozib, O‘zbekistonning IT xabga aylanayotganini muhokama qilmoqda.Bu yil jahonda iqtisodiy o‘sishdagi qiyinchiliklar kuzatilayotgan vaqtda aynan bizning IT park rezidentlari yil boshidan shu kungacha deyarli 2 barobarga ortdi. Eng asosiysi, eksportyor korxonalar soni deyarli 3 barobar ortdi, xorijiy korxonalar ishtirokidagi rezidentlar soni esa 6 barobarga ortdi. Ya’ni yil boshida davlatimiz rahbari tomonidan O‘zbekistonni IT xabga aylantirish bo‘yicha belgilab berilgan vazifalarining amaliy natijalarini bu yil yakunlanmasdanoq ko‘rishga imkon bo‘lyapti va kelgusi yillar uchun yaxshi poydevor yaratilmoqda.
Bu degani, yoshlarimiz, internetdagi vaqtlarini ko‘proq chet tili va axborot texnologiyalarini o‘rganishga sarflaganlari ma’qulroq, bekorga birovni g‘iybat qilgandan ko‘ra. Shunda ular ushbu eksportyor korxonalarda yuqori maoshli ishlarga qabul qilinishlari mumkin bo‘ladi, — deydi vazir.
Zora shu bugungi tutun haqidagi xabarlar orqali yoshlarimiz o‘zi nima ekan bu IT park, qanday qilsam, men ham yuqori daromadli ish topar ekanman deb o‘zlariga savol berib, sohamizga qiziqsalar va o‘z ustilarida ishlashni boshlasalar hamda ko‘proq xalqaro tan olinadigan IT sertifikatlarni olsalar, — deya fikriga yakun yasagan Shermatov.
Ma’lumot uchun, 23-noyabr kuni soat 11:12 da Shahriobod ko‘chasida joylashgan ko‘p qavatli binolarning birida yong‘in sodir bo‘layotgani to‘g‘risida shahar FVBga xabar kelib tushgan. Shunga ko‘ra 3 ta yong‘in-qutqaruv ekipaji soat 11:15 da voqea joyiga yetib borgan va yong‘in soat 11:25 da o‘chirilgan.
Yong‘in oqibatida 24 qavatli qurilishi tugallanmagan IT park binosining 21-qavatida taxminan 5 kvadrat metr maydonda penoplast qoldiqlari yonib zararlangan.
Izoh (0)