Андижонда оёқлари комбайнга кириб кетган фуқаро жонлантириш бўлимида вафот этганди. Энергетика вазирлиги матбуот хизмати унинг ўлимига электр таъминотидаги узилиш сабаб бўлганини рад этди.
9 ноябрь куни бемор Жалақудуқ туманида комбайнга оёқлари кириб кетиши оқибатида олган жароҳати туфайли жонлантириш бўлимига олиб келинган, бироқ кўрсатилган тиббий муолажаларга қарамасдан 10 ноябрь куни вафот этганди. Унинг яқинлари ўлимга электр таъминотидаги узилиш сабаб бўлганини айтмоқда.
Энергетика вазирлиги берган маълумотга кўра, 10 ноябрь куни соат 21:58 дан 22:05 га қадар (7 дақиқа) Қўрғонтепа туман тиббиёт бирлашмасини электр энергияси билан таъминловчи 2 та тармоқдан бирида узилиш содир бўлган.
Андижон вилояти соғлиқни сақлаш бошқармаси ишчи гуруҳи томонидан ўтказилган дастлабки хизмат суриштируви натижаларига кўра, комбайнга икки оёғи билан кириб кетиб, жуда оғир тан жароҳати олган беморга белгиланган стандартлар бўйича муолажалар ўтказилган.
Тезкорлик билан ўтказилган жарроҳлик амалиёти якунланган вақтда электр таъминотида узилиш бўлмаган. Операция тугаганидан кейин бир неча дақиқа вақт ўтиб, электр энергиясида узилиш содир бўлган.
«Таъкидлаш керакки, беморга муолажалар ўтказилаётган операция хоналаридаги барча аппаратлар янги ва замонавий бўлиб, улар электр таъминотида узилиш бўлган ҳолатда ҳам 30 дақиқагача мустақил ишлайди, баъзиларининг қуввати эса 4 соатгача етадиган қўшимча электр таъминоти манбаларига уланган», — дейилади вазирлик хабарида.
Ҳозирда ҳолат юзасидан Жалақудуқ тумани ИИБ Тергов гуруҳи томонидан терговга қадар текширув ҳаракатлари олиб борилмоқда. Марҳумнинг ўлими келиб чиқиш сабабини тўлиқ ҳажмда ўрганиб чиқишлик учун судга оид комиссиявий экспертизаси тайинланган.
Бундан ташқари, меҳнат ва техника хавфсизлиги қоидаларига риоя этилган ёки этилмагани ҳолати юзасидан Меҳнат хавфсизлиги экспертизаси тайинланган. Текшириш жараёни Андижон вилояти прокуратураси томонидан назоратга олинган.
Изоҳ (0)