Toshkent shahri, Namangan, Buxoro viloyatlarida dori vositalarining noqonuniy muomalaga kiritilishining oldi olindi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departament hamda DXXning Sergeli tumani bo‘limlari tomonidan tezkor tadbir o‘tkazilgan. Unda N.F. MCHJ menejeri B. va boshqalar dori vositalarini dorixonalardan tashqarida muomalaga kiritish orqali daromad orttirishni ko‘zlab, fuqaro Sh.ga jami 2200 quti dori vositalarini 132,4 million so‘mga sotgan vaqtda ashyoviy dalillar bilan ushlangan.
Shuningdek, fuqaro S.A. va A.Z. MCHJ rahbari M.A. 2 100 quti “Magne B6” nomli dori vositasini fuqaro M.Y.ga 121,8 million so‘mga sotishga kelishgan. Oldindan 1 million so‘mni olgan vaqtida ashyoviy dalillar bilan ushlangan.
Departamentning Pop tuman bo‘limi tomonidan IIB va DSI xodimlari bilan hamkorlikda o‘tkazilgan tezkor tadbirda fuqaro B. qo‘lga olinngan. U tegishli hujjatlari bo‘lmagan 149 turdagi 136,8 million so‘mlik dori vositalarini Toshkent shahrida o‘tkazish maqsadida olib ketayotgani aniqlanib, ashyoviy dalil sifatida olingan.
Departamentning Kogon shahar bo‘limi tomonidan IIB bilan hamkorlikda o‘tkazilgan tezkor tadbirda esa S.K. MCHJga qarashli dorixonada tegishli hujjatlari bo‘lmagan 357 dona “Gabaten”, 200 dona “Fenibut”, 170 dona “Karbamazapin”, 45 dona “Mezakar” nomli dori vositalari hamda 99 dona oq qizil rangli kapsulalar va 232 dona paketchada “Margansovka” kukuni ashyoviy dalil sifatida olingan.
Holatlar yuzasidan Jinoyat kodeksining 186-3-moddasi (dori vositalarini dorixonalardan va ularning filiallaridan tashqarida realizatsiya qilish) va 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)