Тошкент шаҳри, Наманган, Бухоро вилоятларида дори воситаларининг ноқонуний муомалага киритилишининг олди олинди, деб хабар бермоқда Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департамент ҳамда ДХХнинг Сергели тумани бўлимлари томонидан тезкор тадбир ўтказилган. Унда Н.Ф. МЧЖ менежери Б. ва бошқалар дори воситаларини дорихоналардан ташқарида муомалага киритиш орқали даромад орттиришни кўзлаб, фуқаро Ш.га жами 2200 қути дори воситаларини 132,4 миллион сўмга сотган вақтда ашёвий далиллар билан ушланган.
Шунингдек, фуқаро С.А. ва А.З. МЧЖ раҳбари М.А. 2 100 қути «Магне B6» номли дори воситасини фуқаро М.Й.га 121,8 миллион сўмга сотишга келишган. Олдиндан 1 миллион сўмни олган вақтида ашёвий далиллар билан ушланган.
Департаментнинг Поп туман бўлими томонидан ИИБ ва ДСИ ходимлари билан ҳамкорликда ўтказилган тезкор тадбирда фуқаро Б. қўлга олиннган. У тегишли ҳужжатлари бўлмаган 149 турдаги 136,8 миллион сўмлик дори воситаларини Тошкент шаҳрида ўтказиш мақсадида олиб кетаётгани аниқланиб, ашёвий далил сифатида олинган.
Департаментнинг Когон шаҳар бўлими томонидан ИИБ билан ҳамкорликда ўтказилган тезкор тадбирда эса С.К. МЧЖга қарашли дорихонада тегишли ҳужжатлари бўлмаган 357 дона «Габатен», 200 дона «Фенибут», 170 дона «Карбамазапин», 45 дона «Мезакар» номли дори воситалари ҳамда 99 дона оқ қизил рангли капсулалар ва 232 дона пакетчада «Маргансовка» кукуни ашёвий далил сифатида олинган.
Ҳолатлар юзасидан Жиноят кодексининг 186-3-моддаси (дори воситаларини дорихоналардан ва уларнинг филиалларидан ташқарида реализация қилиш) ва 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)