O‘zbekiston Fransiya kompaniyasidan 17 ta samolyot sotib oladi. Bu haqda Transport vazirligi matbuot kotibi Navro‘z Ashirmatov “Daryo”ga ma’lum qildi.
Qayd etilishicha, Fransiya O‘zbekistonga umumiy qiymati salkam 800 million yevro bo‘lgan 12 ta Airbus A320neo va A321neo samolyoti, shuningdek, 5 ta ATR 72-600 samolyotini yetkazib beradi. Bundan tashqari, ikkita Airbus H145 vertolyotini xarid qilish reja qilingan.
“Gazeta.uz”ga ko‘ra, Airbus’dan 694,3 million yevroga 8 ta A320neo va 4 ta A321neo samolyoti xarid qilinishi kutilmoqda. Kelishuv 21 million yevroga ikkita Airbus H145 vertolyotini sotib olishni nazarda tutadi.
22-noyabr kuni Fransiya Tashqi ishlar vazirligi binosida bo‘lib o‘tgan marosimda O‘zbekiston transport vaziri Ilhom Mahkamov va Airbus International kompaniyasining Sharqiy Yevropa va Markaziy Osiyo bo‘yicha vitse-prezidenti Jak Garrige Airbus va Uzbekistan Airways o‘rtasidagi shartnomalarni almashgan.
Bundan tashqari, 100 million yevroga 5 dona ATR 72-600 rusumli samolyot yetkazib berish bo‘yicha shartnoma imzolangan.
Uzbekistan Airports ma’lumotiga ko‘ra, Silk Avia va ATR beshta ATR 72-600 samolyotini sotib olish bo‘yicha shartnoma imzolagan.
Silk Avia va Franko-Italiya konserni ATR o‘rtasida beshta yangi ATR 72-600 samolyotlarini sotib olish bo‘yicha asosiy shartnoma imzolangan, ularning uchtasi to‘g‘ridan to‘g‘ri ishlab chiqaruvchidan va ikkitasi lizing beruvchidan hisoblanadi. Shavkat Mirziyoyevning Fransiyaga rasmiy tashrifi arafasida Parijda O‘zbekistonning birinchi mintaqaviy aviakompaniyasi uchun samolyotlar xarid qilish bo‘yicha kelishuv imzolangan.
“Biz aviakompaniyamizning yaqin kelajakda ATR samolyotlarida parvozlarni boshlashidan juda mamnunmiz. Narx jihatdan qaysi aviakompaniya bizga eng yaxshi yechim bo‘lishini chuqur tahlil qildik. ATR 72-600 dunyodagi eng mashhur qisqa masofali samolyotlardan biridir. A320’ga qaraganda to‘rt barobar kam yonilg‘i sarflaydigan tejamkor arzon samolyot yo‘lovchilarga hamyonbop narxda ishonchlilik va qulaylikni taklif qilish imkonini beradi”, — dedi Uzbekistan Airports boshqaruvi raisi Ra’no Jo‘rayeva.
Parijdagi uchrashuv doirasida Silk Avia va ATR global texnik xizmat ko‘rsatish shartnomasini ham imzoladi. Shartnoma texnik xizmat ko‘rsatish xarajatlarini sezilarli darajada kamaytiradi va ish unumdorligini oshiradi. Hujjat texnik xizmat ko‘rsatish va kapital ta’mirlash, agregatlarni almashtirish, ehtiyot qismlar zaxirasini o‘z ichiga oladi.
“O‘zbekistondek jadal rivojlanayotgan mamlakatda Silk Avia ichki turizmni rivojlantirish va iqtisodiyotni rag‘batlantirishda muhim rol o‘ynaydi. Tadqiqotlar shuni ko‘rsatdiki, mintaqaviy reyslarning 10 foizga oshishi mahalliy yalpi ichki mahsulotning 5 foizga o‘sishiga olib kelishi mumkin va ATR ishonchli va arzon mintaqaviy samolyotlar bilan ta’minlash orqali o‘z vazifasini bajarmoqda. Biz Silk Avia kompaniyasini Markaziy Osiyoda ATR uchun yangi bozor ochgan yangi hamkorimiz sifatida kutib olishdan mamnunmiz”, — dedi ATR bosh direktori Natali Tarno Laud.
Shartnoma doirasida Silk Avia yangi avlod PW127XT dvigatellari bilan jihozlangan samolyotlarni oladi, bu esa mavjud dvigatellarga nisbatan texnik xizmat ko‘rsatish xarajatlarini 20 foizga, yonilg‘i sarfini esa 3 foizga qisqartirishni ta’minlaydi. Silk Avia samolyotlari Markaziy Osiyoda uchadigan birinchi yangi ATRlar bo‘ladi.
Mavzuga doir:
- “Mudofaa vazirligiga 40 ta vertolyot yetkazib berdik” — Airbus vitse-prezidenti kompaniyaning O‘zbekistondagi biznesi haqida
- “Biznesimizni yanada kengaytirish niyatidamiz” — Airbus aviakompaniyasi vitse-prezidenti O‘zbekistonga investitsiya kiritish haqida
- Medef, Airbus, EDF: Shavkat Mirziyoyev Fransiyaning yetakchi kompaniyalari rahbarlari bilan uchrashdi (foto)
Izoh (0)