Ўзбекистон Франция компаниясидан 17 та самолёт сотиб олади. Бу ҳақда Транспорт вазирлиги матбуот котиби Наврўз Аширматов «Дарё»га маълум қилди.
Қайд этилишича, Франция Ўзбекистонга умумий қиймати салкам 800 миллион евро бўлган 12 та Airbus A320neo ва A321neo самолёти, шунингдек, 5 та ATR 72-600 самолётини етказиб беради. Бундан ташқари, иккита Airbus H145 вертолётини харид қилиш режа қилинган.
«Gazeta.uz»га кўра, Airbus’дан 694,3 миллион еврога 8 та A320neo ва 4 та A321neo самолёти харид қилиниши кутилмоқда. Келишув 21 миллион еврога иккита Airbus H145 вертолётини сотиб олишни назарда тутади.
22 ноябрь куни Франция Ташқи ишлар вазирлиги биносида бўлиб ўтган маросимда Ўзбекистон транспорт вазири Илҳом Маҳкамов ва Airbus International компаниясининг Шарқий Европа ва Марказий Осиё бўйича вице-президенти Жак Гарриге Airbus ва Uzbekistan Airways ўртасидаги шартномаларни алмашган.
Бундан ташқари, 100 миллион еврога 5 дона ATR 72-600 русумли самолёт етказиб бериш бўйича шартнома имзоланган.
Uzbekistan Airports маълумотига кўра, Silk Avia ва ATR бешта ATR 72-600 самолётини сотиб олиш бўйича шартнома имзолаган.
Silk Avia ва Франко-Италия концерни ATR ўртасида бешта янги ATR 72-600 самолётларини сотиб олиш бўйича асосий шартнома имзоланган, уларнинг учтаси тўғридан-тўғри ишлаб чиқарувчидан ва иккитаси лизинг берувчидан ҳисобланади. Шавкат Мирзиёевнинг Францияга расмий ташрифи арафасида Парижда Ўзбекистоннинг биринчи минтақавий авиакомпанияси учун самолётлар харид қилиш бўйича келишув имзоланган.
«Биз авиакомпаниямизнинг яқин келажакда ATR самолётларида парвозларни бошлашидан жуда мамнунмиз. Нарх жиҳатдан қайси авиакомпания бизга энг яхши ечим бўлишини чуқур таҳлил қилдик. ATR 72-600 дунёдаги энг машҳур қисқа масофали самолётлардан биридир. А320’га қараганда тўрт баробар кам ёнилғи сарфлайдиган тежамкор арзон самолёт йўловчиларга ҳамёнбоп нархда ишончлилик ва қулайликни таклиф қилиш имконини беради», — деди Uzbekistan Airports бошқаруви раиси Раъно Жўраева.
Париждаги учрашув доирасида Silk Avia ва ATR глобал техник хизмат кўрсатиш шартномасини ҳам имзолади. Шартнома техник хизмат кўрсатиш харажатларини сезиларли даражада камайтиради ва иш унумдорлигини оширади. Ҳужжат техник хизмат кўрсатиш ва капитал таъмирлаш, агрегатларни алмаштириш, эҳтиёт қисмлар захирасини ўз ичига олади.
«Ўзбекистондек жадал ривожланаётган мамлакатда Silk Avia ички туризмни ривожлантириш ва иқтисодиётни рағбатлантиришда муҳим рол ўйнайди. Тадқиқотлар шуни кўрсатдики, минтақавий рейсларнинг 10 фоизга ошиши маҳаллий ялпи ички маҳсулотнинг 5 фоизга ўсишига олиб келиши мумкин ва ATR ишончли ва арзон минтақавий самолётлар билан таъминлаш орқали ўз вазифасини бажармоқда. Биз Silk Avia компаниясини Марказий Осиёда ATR учун янги бозор очган янги ҳамкоримиз сифатида кутиб олишдан мамнунмиз», — деди ATR бош директори Натали Тарно Лауд.
Шартнома доирасида Silk Avia янги авлод PW127XT двигателлари билан жиҳозланган самолётларни олади, бу эса мавжуд двигателларга нисбатан техник хизмат кўрсатиш харажатларини 20 фоизга, ёнилғи сарфини эса 3 фоизга қисқартиришни таъминлайди. Silk Avia самолётлари Марказий Осиёда учадиган биринчи янги АTR’лар бўлади.
Мавзуга доир:
- «Мудофаа вазирлигига 40 та вертолёт етказиб бердик» — Airbus вице-президенти компаниянинг Ўзбекистондаги бизнеси ҳақида
- «Бизнесимизни янада кенгайтириш ниятидамиз» — Airbus авиакомпанияси вице-президенти Ўзбекистонга инвестиция киритиш ҳақида
- Медеф, Airbus, EDF: Шавкат Мирзиёев Франциянинг етакчи компаниялари раҳбарлари билан учрашди (фото)
Изоҳ (0)