Avval xabar berilganidek, O‘zbekiston Prezidenti Shavkat Mirziyoyevning Fransiya Respublikasiga oliy darajadagi tashrifi doirasida Parijda navbatdagi o‘zbek-fransuz biznes-forumi bo‘lib o‘tdi. Ushbu tadbir ikkala mamlakatning 200 ga yaqin ishbilarmon vakillarni qamrab oldi. Uning doirasida “O‘zmilliybank” AJ, O‘zbekiston savdo-sanoat palatasi hamda gastronomiya va mehmonxona menejmenti sohasiga ixtisoslashtirilgan Fransiyasning “Ferrandi Paris” instituti o‘rtasida hamkorlik bitimi tuzildi.
Mazkur bitim birinchi navbatda 500dan ortiq tadbirkorlik subyektlarini o‘qitish va ularning mehmonxona hamda restoran biznesidagi malakasini oshirish, fransuz institutining o‘zbek hamkorlar bilan birgalikda fransuz, xorij tajribasini o‘rganish uchun mahalliy oliy o‘quv yurtlarida o‘quv kurslarini tashkil etish imkonini beradi. Shuningdek, 2023-yilga kelib O‘zbekiston hududida keng miqyosdagi, xususan, turizm, mehmonxona biznesi, gastronomiya va boshqa sohalardagi kadrlarni tayyorlash bo‘yicha ta’lim markazi tuzishga yo‘l ochadi. Bitim bilan, shuningdek, O‘zbekiston prezidentining xizmatlar sohasini rivojlantirish sohasiga qarorlarining tegishli qismlari amalga oshiriladi.
“Ferrandi Paris” Parij savdo-sanoat palatasi qoshida 1920-yilda gastronomiya va mehmonxona menejmenti sohasida yetuk kadrlarni tayyorlab chiqarish maqsadida tashkil etilgan. Institut xizmat ko‘rsatish (HORECA yo‘nalishi) sohasida kadrlarni tayyorlab berishda dunyoning eng yaxshi maktablaridan biri sanaladi. Maktab mehmonxona va restoran yo‘nalishida bakalavr hamda magistrlarni tayyorlash tajribasini almashish maqsadida xorijiy ta’lim muassasalari bilan munosabatlarni rivojlantirib bormoqda. Har yili “Ferrandi Paris” 3 mingdan ziyodroq, shu jumladan, yer yuzining 30 mamlakatidan kelgan 300 nafar talabalarni qabul qiladi.
Izoh (0)