Yil boshidan beri O‘zbekistonda eksport va import qanday o‘zgargani tahlil qilindi. Bu haqda Davlat statistika qo‘mitasi matbuot xizmati xabar bermoqda.
Tashqi savdo umumiy hajmida eksport ulushi 15,5 mlrd dollarni (2021-yil yanvar—sentabr oylarida o‘sish 23,8 foiz), import 24,6 mlrd dollarni (o‘sish 21,2 foiz) tashkil etdi.
Joriy yilning yanvar—oktabr oylarida mamlakatning eksportyorlari soni 6 586 tani tashkil etib, ular tomonidan 12,5 mlrd dollar qiymatidagi tovar va xizmatlar eksport qilinishi ta’minlandi.
Eksport tarkibida tovarlar ulushi 78,8 foizni tashkil etib, ular sanoat tovarlari (23,9 foiz), oziq-ovqat mahsulotlari va tirik hayvonlar (8,2 foiz), kimyoviy vositalar va shunga o‘xshash mahsulotlar (7,1 foiz) hissasiga to‘g‘ri kelmoqda.
Eksportning eng katta hajmi 2022-yil fevral oyida qayd etilib, 2,6 mlrd dollarni tashkil etdi. 2021-yilning shu oyiga nisbatan 1,8 mlrd dollarga ko‘paydi.
2022-yil oktabr oyida eksport hajmi 1,4 mlrd dollarni tashkil etdi va 2021-yilning shu davriga nisbatan 33,4 foizga kamaydi.
2022-yil yanvar—oktabr oylarida meva-sabzavot mahsulotlari jami eksportning 5,8 foizini tashkil etdi.
Shuningdek, yil boshidan 532 turdagi to‘qimachilik mahsulotlari dunyoning 69 ta davlatiga eksport qilindi. Eksport qilingan to‘qimachilik mahsulotlari tarkibida paxtadan yigirilgan ip (46,6 foiz), tayyor trikotaj va tikuvchilik kiyimlari (27,2 foiz) asosiy ulushni egallagan.
Bundan tashqari, xizmatlar eksporti hajmi 3,2 mlrd dollarni yoki jami eksport hajmining 21,2 foizini tashkil etib, 2021-yilning mos davriga nisbatan 55,8 foizga ko‘paydi.
Oltin eksportidan tushgan tushum aprel oyidan buyon o‘zgarmadi — 2,97 milliard dollar. Bunga sabab esa O‘zbekiston yetti oy davomida xorijga qimmatbaho metall yetkazib bermaganidir.
Davlat statistika qo‘mitasi ma’lumotlariga ko‘ra, 2022-yilning yanvar—oktabr oylarida O‘zbekiston importida yuqori ulushga ega bo‘lgan hamkor davlatlar:
- Xitoy — 5,3 mlrd dollar;
- Rossiya — 4,9 mlrd dollar;
- Qozog‘iston — 2,6 mlrd dollar;
- Koreya — 1,9 mlrd dollar;
- Turkiya — 1,4 mlrd dollar;
- Germaniya — 789 mln dollar;
- Hindiston — 530 mln dollar;
- Braziliya — 461,5 mln dollar;
- Turkmaniston — 443,5 mln dollar;
- Litva — 334,4 mln dollar.
Import tarkibida eng katta ulush, mashinalar va transport asbob-uskunalari (31,6 foiz), sanoat tovarlari (19,3 foiz) hamda kimyoviy vositalar va shunga o‘xshash mahsulotlar (13,9 foiz) hisobiga to‘g‘ri keldi.
Tovarlar importi dinamikasi tahliliga ko‘ra, 2022-yilning yanvar—oktabr oylarida import qilingan tovarlar hajmi, o‘tgan yilning mos davriga nisbatan 3,5 mlrd dollarga ko‘paydi va 22,5 mlrd dollarini tashkil etdi. Xizmatlar importi esa 2,1 mlrd dollarga yetdi.
Importning eng katta hajmi 2022-yilning mart oyida qayd etilib, 2,7 mlrd dollarni tashkil etdi. 2021-yilning shu oyiga nisbatan 862,8 mln dollarga kamaydi. 2022-yil oktabr oyida import hajmi 2,6 mlrd dollarni tashkil etdi va 2021-yilning shu davriga nisbatan 12,6 foizga ko‘paydi.
Avvalroq yil boshidan beri O‘zbekistonning tashqi savdosi qanday o‘zgargani ma’lum qilingani haqida xabar berilgandi.
Izoh (0)