Йил бошидан бери Ўзбекистонда экспорт ва импорт қандай ўзгаргани таҳлил қилинди. Бу ҳақда Давлат статистика қўмитаси матбуот хизмати хабар бермоқда.
Ташқи савдо умумий ҳажмида экспорт улуши 15,5 млрд долларни (2021 йил январь—сентябрь ойларида ўсиш 23,8 фоиз), импорт 24,6 млрд долларни (ўсиш 21,2 фоиз) ташкил этди.
Жорий йилнинг январь—октябрь ойларида мамлакатнинг экспортёрлари сони 6 586 тани ташкил этиб, улар томонидан 12,5 млрд доллар қийматидаги товар ва хизматлар экспорт қилиниши таъминланди.
Экспорт таркибида товарлар улуши 78,8 фоизни ташкил этиб, улар саноат товарлари (23,9 фоиз), озиқ-овқат маҳсулотлари ва тирик ҳайвонлар (8,2 фоиз), кимёвий воситалар ва шунга ўхшаш маҳсулотлар (7,1 фоиз) ҳиссасига тўғри келмоқда.
Экспортнинг энг катта ҳажми 2022 йил февраль ойида қайд этилиб, 2,6 млрд долларни ташкил этди. 2021 йилнинг шу ойига нисбатан 1,8 млрд долларга кўпайди.
2022 йил октябрь ойида экспорт ҳажми 1,4 млрд долларни ташкил этди ва 2021 йилнинг шу даврига нисбатан 33,4 фоизга камайди.
2022 йил январь—октябрь ойларида мева-сабзавот маҳсулотлари жами экспортнинг 5,8 фоизини ташкил этди.
Шунингдек, йил бошидан 532 турдаги тўқимачилик маҳсулотлари дунёнинг 69 та давлатига экспорт қилинди. Экспорт қилинган тўқимачилик маҳсулотлари таркибида пахтадан йигирилган ип (46,6 фоиз), тайёр трикотаж ва тикувчилик кийимлари (27,2 фоиз) асосий улушни эгаллаган.
Бундан ташқари, хизматлар экспорти ҳажми 3,2 млрд долларни ёки жами экспорт ҳажмининг 21,2 фоизини ташкил этиб, 2021 йилнинг мос даврига нисбатан 55,8 фоизга кўпайди.
Олтин экспортидан тушган тушум апрель ойидан буён ўзгармади — 2,97 миллиард доллар. Бунга сабаб эса Ўзбекистон етти ой давомида хорижга қимматбаҳо металл етказиб бермаганидир.
Давлат статистика қўмитаси маълумотларига кўра, 2022 йилнинг январь—октябрь ойларида Ўзбекистон импортида юқори улушга эга бўлган ҳамкор давлатлар:
- Хитой — 5,3 млрд доллар;
- Россия — 4,9 млрд доллар;
- Қозоғистон — 2,6 млрд доллар;
- Корея — 1,9 млрд доллар;
- Туркия — 1,4 млрд доллар;
- Германия — 789 млн доллар;
- Ҳиндистон — 530 млн доллар;
- Бразилия — 461,5 млн доллар;
- Туркманистон — 443,5 млн доллар;
- Литва — 334,4 млн доллар.
Импорт таркибида энг катта улуш, машиналар ва транспорт асбоб-ускуналари (31,6 фоиз), саноат товарлари (19,3 фоиз) ҳамда кимёвий воситалар ва шунга ўхшаш маҳсулотлар (13,9 фоиз) ҳисобига тўғри келди.
Товарлар импорти динамикаси таҳлилига кўра, 2022 йилнинг январь—октябрь ойларида импорт қилинган товарлар ҳажми, ўтган йилнинг мос даврига нисбатан 3,5 млрд долларга кўпайди ва 22,5 млрд долларини ташкил этди. Хизматлар импорти эса 2,1 млрд долларга етди.
Импортнинг энг катта ҳажми 2022 йилнинг март ойида қайд этилиб, 2,7 млрд долларни ташкил этди. 2021 йилнинг шу ойига нисбатан 862,8 млн долларга камайди. 2022 йил октябрь ойида импорт ҳажми 2,6 млрд долларни ташкил этди ва 2021 йилнинг шу даврига нисбатан 12,6 фоизга кўпайди.
Аввалроқ йил бошидан бери Ўзбекистоннинг ташқи савдоси қандай ўзгаргани маълум қилингани ҳақида хабар берилганди.
Изоҳ (0)