Saakashvilining tarafdorlari uning xorijda davolanishini talab qilib miting uyushtirdi

Aksiyani shifokorlar tashkillashtirgan, ular Mixail Saakashvilining tarafdorlaridan siyosiy talablar bildirmaslikni so‘ragan. DW xabar berishicha, namoyishda mingga yaqin odam qatnashgan.

Avvalroq Gruziya sobiq rahbarining onasi Giuli Alasaniya Saakashvilining tanasida og‘ir metallar, jumladan, simob miqdori normadan oshib ketgani aniqlanganini aytgandi. Uning tanasiga moddalar qanday tushgani noma’lum, deydi ayol. Gruziya Adliya vazirligining Jazoni ijro etish maxsus xizmati bu ma’lumotni rad etdi. Shu bilan birga, vazirlik rahbari Rati Bregadze “aholi Mixail Saakashvilining sog‘lig‘i haqida to‘liq ma’lumotga ega bo‘lishi uchun” uning zaharlangani bo‘yicha toksikologik tadqiqot o‘tkazishni so‘rab Milliy ekspertiza byurosiga murojaat qilmoqchiligini ta’kidladi.