AQSHning Xyuston universiteti olimlari birinchi marta narkotikka qarshi vaksina ishlab chiqdi. Bu haqda Daily Mail xabar berdi.
Mazkur tadqiqot giyohvandlikka qarshi kurashda yutuq bo‘lishi mumkin. Ishlab chiqilgan vaksina narkotikning kalamushlar miyasiga kirishini to‘sgan va giyohvandlikning oldini olishda muvaffaqiyatli bo‘lgan. Giyohvandlikka qarshi vaksinalarni ishlab chiqishga urinishlar 30 yildan ortiq vaqt davomida amalga oshirilmoqda.
Vaksina bilan emlanganda bemorning qonida narkotikni ushlab turadigan va uning miyaga kirishiga to‘sqinlik qiladigan antitanachalar paydo bo‘ladi. Xyuston olimlari vaksinada narkotik, immunogen oqsil va protein yordamchisidan foydalangan. Kalamushlar emlanganidan olti hafta o‘tgach, narkotikning miyaga borishi to‘sib qo‘yilgani tasdiqlangan. Preparat kalamushlar miyasidagi giyohvand modda miqdorini o‘n baravar kamaytirgan.
Bundan tashqari, hech qanday salbiy ta‘sir kuzatilmagan. Vaksina natijasida paydo bo‘lgan immunitet qanchalik barqaror ekani hali aniq emas. Olimlar uning ta‘sirini emlashdan boshlab 10 hafta ichida kuzatdi.
Ta’kidlanishicha, preparat tor maqsadli bo‘lib, u hayvonlarni faqat ikki turdagi opiatlardan (narkotik afyun alkaloidlari) — fentanil va sufentanildan himoya qilgan. Ammo uni yaratish uchun ishlatiladigan mexanizm boshqa narkotiklarga qarshi vaksinalarni ishlab chiqishda qo‘llanilishi mumkin.
Fentanil — tibbiyotda narkotik sifatida ishlatiladi, sufentanildan kuchliroq va ta‘siri uzoq davom etadi.
Eslatib o‘tamiz, COVID-vaksinani yaratgan BioNTech kompaniyasi saratonga qarshi vaksina ishlab chiqmoqda. U 2030-yilgacha tayyor bo‘lishi mumkin.
Izoh (0)