Zimbabveda 280,4 foiz: Dunyo mamlakatlarida narxlar qanchalik tez o‘smoqda?

Dunyo bo‘ylab sentabr oyida yillik inflyatsiya Zimbabve, Livan, Venesuela va Sudanda eng yuqori bo‘lgan. Bu haqda “RIA Novosti” xabar bermoqda. 

Tadqiqot agentlik tomonidan 193 mamlakat milliy statistika xizmatlari ma’lumotlari asosida o‘tkazildi. 

Ta’kidlanishicha, sentabrda dunyodagi eng yuqori inflyatsiya Zimbabveda qayd etilgan — 280,4 foiz. Mamlakatda narxlar oshishi qish oxiridan boshlab tezlasha boshladi va sentabrgacha u 4,6 barobar oshdi.

Sudan 107 foiz bilan Afrika mintaqasida ikkinchi va dunyo miqyosida to‘rtinchi o‘rinni egalladi. Uchinchi o‘rinda 37,2 foiz ko‘rsatkich bilan Gana ko‘rsatilgan. 

Dunyoda ikkinchi, Yaqin Sharq va Shimoliy Afrika mamlakatlari orasida birinchi o‘rin Livanga tegishli bo‘lib, u yerda inflyatsiya 162,47 foizga yetdi. Biroq mamlakatda yil boshidan buyon narxlar oshishi 1,4 baravar sekinlashgan. 

Bundan tashqari, ushbu mintaqada narxlarning sezilarli o‘sishi Turkiya (83,5 foiz) va Misrda (15,02) kuzatilgan.

Janubiy Amerikada Venesuela ko‘p yillar davomida yuqori inflyatsiyadan aziyat chekmoqda. 157,4 foizlik ko‘rsatkich bilan u dunyoda uchinchi o‘rinni egallab turibdi. Shunga qaramay, mamlakatda inflyatsiya o‘tgan yil oxiridan buyon 4,4 baravar pasaygan. 

Janubiy Amerikada ikkinchi o‘rinda Argentina turadi, u yerda kuz boshida narxlarning o‘sishi 83 foizgacha tezlashdi, Surinam esa 41,4 foiz ko‘rsatkich bilan uchinchi o‘rinda.

Shimoliy Amerikada Kuba 37,24 foiz inflyatsiya bilan yetakchilik qildi, Nikaragua 11,52 foiz va Kosta-Rika 10,37 foiz.

Yevropa qit’asida sentabr oyida eng yuqori inflyatsiya Moldovada qayd etilgan — 34 foiz. Ikkinchi o‘rinni Ukraina (24,6 foiz) egallagan bo‘lsa, uchinchi o‘rinda Litva qayd etilgan — 24,1 foiz.  

Osiyoda narxlar sentabr oyida Shri-Lankada 73,7 foiz, Laosda 34 foiz va Pokistonda 23,2 foiz bilan eng ko‘p ko‘tarilgan. 

Okeaniya mamlakatlari orasida inflyatsiya eng yuqori Tonga qirolligida — 14 foiz, Samoada — 11 foiz va Palauda — 10,3 foiz.

O‘zbekistonda sentabr oyida yillik inflyatsiya 12,2 foizni tashkil qilgan. Oktabrda ham bu ko‘rsatkich o‘zgarmagan.