Birlashgan Millatlar Tashkilotining (BMT) COP27 iqlim konferensiyasi ishtirokchilari iqlim o‘zgarishi ta’siridan jabr ko‘rgan zaif mamlakatlarga yordam berish uchun jamg‘arma tashkil etishga kelishib oldi.
Misrning Sharm ash-Shayx shahrida bo‘lib o‘tgan sammitning yakuniy bayonoti BMT iqlim kotibiyatining rasmiy saytida e’lon qilindi.
Ushbu anjumanda adolat yo‘lida muhim qadam qo‘yildi. Men yo‘qotishlar va zararlarni qoplash uchun jamg‘arma tashkil etish qarorini olqishlayman, — dedi BMT Bosh kotibi Antoniu Guterrish delegatlarga yo‘llagan videomurojaatida. Uning so‘zlari BMT saytidagi xabarda keltirilgan.
Shuningdek, konferensiya ishtirokchilari jamg‘armani kim moliyalashtirishi va bu mablag‘lardan qaysi davlatlar foydalanishi mumkinligi borasida kelisha olmagani qayd etilgan. Ushbu muammoning yechimi “keyingi muhokamalar uchun mavzu bo‘lib qoldi”, deyiladi xabarda.
COP27 ishtirokchilari qazib olinadigan yonilg‘ilarni bosqichma-bosqich to‘xtatish va global isishni 1,5 gradus darajasida ushlab turish zarurligi kabi bir qator boshqa muhim masalalarda birlasha olmadi.
Kambag‘al mamlakatlarga yordam berish uchun jamg‘arma yaratish qarori buzilgan ishonchni tiklash uchun zarur bo‘lgan o‘ta muhim siyosiy signal, ammo iqlim muammosini hal qilish uchun bu yetarli bo‘lmaydi. Biz hozir emissiyani keskin kamaytirishimiz kerak — ammo konferensiya bu savolga javob topa olmadi, — dedi Guterrish.
COP27 natijalaridan Yevropa komissiyasi raisi o‘rinbosari Frans Timmermans haflasi pir bo‘lganini ochiqchasiga aytib o‘tdi.
Biz qilayotgan ishlar odamlar va sayyora uchun yetarli qadam emas. Ko‘plab davlatlar jasorat bilan global isishni sekinlashtirishga rozi bo‘lmadi. Dunyo bizga rahmat aytmaydi, — deydi Timmermans.
Uning so‘zlariga ko‘ra, agar dunyo uglerod chiqindilarini keskin qisqartirishni boshlamasa, yangi jamg‘arma bartaraf etishi kerak bo‘lgan iqlim ofatlaridan zarar va yo‘qotishlar oshadi.
Biz Glazgodagi konferensiyadan keyin ancha sekinlashdik. Xalqimiz va sayyoramiz uchun behuda vaqt yo‘q, — deya xulosa qildi Frans Timmermans.
BMTning so‘nggi yirik iqlim konferensiyasi 2021-yilning noyabr oyida Shotlandiyaning Glazgo shahrida bo‘lib o‘tgandi.
Uning a’zolari global haroratni 1,5 gardusdan ortiq ko‘tarmaslikka kelishib olgandi. Shundan so‘ng ekspertlar va ekologlar qabul qilingan qarorlar iqlim o‘zgarishining oldini olish uchun yetarli emasligini ta’kidladi.
Izoh (0)