Namangan shahrining Davlatobod tumanidagi ko‘p qavatli uylarda strit-art namunalari paydo bo‘ldi. Bu haqda “Daryo” muxbiri Azizbek Abduvaliyev xabar bermoqda.
Tumanning “Elobod” dahasidagi 16 qavatli uchta uy devoriga chizilgan murallar rassom Rasuljon Mirzayev qalamiga mansub. Yaqinda Namangan davlat universitetining san’atshunoslik fakultetini tamomlagan Rasuljonning aytishicha, ularni shu fakultetda o‘qiyotgan ikki nafar talaba shogirdi bilan birga chizmoqda.
“Murallarga eng kami 40 kun vaqtimiz ketdi. Hozir yakuniga yetayotgani gullar bilan bog‘liq va murakkab bo‘lgani bois ikki oydan ko‘proq qo‘l ushladi. Oldin ularning eskizini tayyorlab, aniq hisob-kitobini chiqarib olamiz. Agar shunday qilmasak, urinishlarimiz behuda ketadi”, — deydi Rasuljon.
Mahobatli rasmlar bo‘yi 50, eni 22 metr bo‘lgan devorlarga chizilmoqda. Ular ko‘p qavatli uylarga ko‘tarma mashinalar yordamida, suvga chidamli bo‘yoqlarda beriladi. Bitta mural uchun o‘rtacha 25-30 million so‘mlik bo‘yoq ketadi. Rassomlar brigadasiga esa 20 million so‘m atrofida ish haqi beriladi.
Rasuljonning aytishicha, murallardan biri Toshkent shahrining Yangihayot tumaniga tashrif davomida prezident Shavkat Mirziyoyevga ma’qul kelgan tasvirdan ilhomlanib, biroq undan murakkabroq tarzda chizilgan. U Eloboddagi ko‘p qavatli uylarni qurayotganlar va o‘zi ham davlat rahbarining “Nega hamma yoqda shunday qilmaysizlar? Bu murallar odamning kayfiyatiga ijobiy ta’sir qiladi” degan so‘zlaridan ruhlanganini ta’kidlaydi.
“Eng asosiysi, chizgan rasmlarimiz shu yerda yashovchi aholiga ma’qul kelyapti. Ular har gal bizni ko‘rganda duo qilib, minnatdorliklarini bildirib ketishyapti. Shu hududdagi yana ikki-uchta ko‘p qavatli uyga shunday murallar chizish rejamizda bor”, — deydi rassom.
Mavzuga doir:
Izoh (0)