Наманган шаҳрининг Давлатобод туманидаги кўп қаватли уйларда стрит-арт намуналари пайдо бўлди. Бу ҳақда «Дарё» мухбири Азизбек Абдувалиев хабар бермоқда.
Туманнинг «Элобод» даҳасидаги 16 қаватли учта уй деворига чизилган мураллар рассом Расулжон Мирзаев қаламига мансуб. Яқинда Наманган давлат университетининг санъатшунослик факультетини тамомлаган Расулжоннинг айтишича, уларни шу факультетда ўқиётган икки нафар талаба шогирди билан бирга чизмоқда.
«Муралларга энг ками 40 кун вақтимиз кетди. Ҳозир якунига етаётгани гуллар билан боғлиқ ва мураккаб бўлгани боис икки ойдан кўпроқ қўл ушлади. Олдин уларнинг эскизини тайёрлаб, аниқ ҳисоб-китобини чиқариб оламиз. Агар шундай қилмасак, уринишларимиз беҳуда кетади», — дейди Расулжон.
Маҳобатли расмлар бўйи 50, эни 22 метр бўлган деворларга чизилмоқда. Улар кўп қаватли уйларга кўтарма машиналар ёрдамида, сувга чидамли бўёқларда берилади. Битта мурал учун ўртача 25-30 миллион сўмлик бўёқ кетади. Рассомлар бригадасига эса 20 миллион сўм атрофида иш ҳақи берилади.
Расулжоннинг айтишича, мураллардан бири Тошкент шаҳрининг Янгиҳаёт туманига ташриф давомида президент Шавкат Мирзиёевга маъқул келган тасвирдан илҳомланиб, бироқ ундан мураккаброқ тарзда чизилган. У Элободдаги кўп қаватли уйларни қураётганлар ва ўзи ҳам давлат раҳбарининг «Нега ҳамма ёқда шундай қилмайсизлар? Бу мураллар одамнинг кайфиятига ижобий таъсир қилади» деган сўзларидан руҳланганини таъкидлайди.
«Энг асосийси, чизган расмларимиз шу ерда яшовчи аҳолига маъқул келяпти. Улар ҳар гал бизни кўрганда дуо қилиб, миннатдорликларини билдириб кетишяпти. Шу ҳудуддаги яна икки-учта кўп қаватли уйга шундай мураллар чизиш режамизда бор», — дейди рассом.
Мавзуга доир:
Изоҳ (0)