Самарқанд вилоятида оилавий келишмовчилик сабаб келиб чиққан жанжалда келин қайнонасини ғишт билан уриб ўлдирди. Бу ҳақда «Дарё»га Бош прокуратура матбуот хизмати хабар қилди.
Қайд этилишича, 19 октябрь куни соат 19:30 ларда Ургут тумани ИИБга «Чағизмон» маҳалласида яшовчи фуқаро Ш.Ф. ариза мурожаат қилган. У ўз мурожаатида шу куни соат 19:00 ларда онаси М.Р. (1977 йилда туғилган)нинг яшаш уйига борганини, эшикдан чақирган вақтида ҳеч ким жавоб бермагани сабабли уйга кирганда онасининг мурдаси тан жароҳатлари билан ётганини маълум қилган.
Воқеа жойига вилоят прокуратураси раҳбарияти, Самарқанд вилоят ИИБ раҳбарияти ва Ургут туман прокурори, Ургут туман ИИБ раҳбарияти ҳамда тезкор тергов гуруҳи тўлиқ таркибда етиб келган.
Ҳолат юзасидан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Суриштирув ишлари давомида марҳума М.Р. билан келини М.Қ. ўртасида келишмовчилик келиб чиққани аниқланган. Жанжал вақтида гумонланувчи М.Қ. яшаш ҳовлисидан ғишт бўлагини олиб, М.Р.нинг бош қисмига уриб, тан жароҳати етказган. Шундан сўнг марҳума воқеа жойида вафот этган.
Гумонланувчи М.Қ. (1996 йилда туғилган) Ургут тумани «Сўфиён» МФЙда яшовчи отаси А.Қ.нинг яшаш уйига кетиб қолгани аниқланиб, ушланган.
Изоҳ (0)