O‘zbekistondagi mahallalar infratuzilmasini yanada yaxshilashga 2022-yilda 2 trillion 700 milliard so‘m yo‘naltirildi. Bu haqda Senat yalpi majlisida parlament yuqori palatasi raisi Tanzila Norboyeva aytib o‘tdi.
Tanzila Norboyevaning ta’kidlashicha, mazkur yo‘nalishga ajratilayotgan mablag‘lar miqdori prezidentning 2022-2023-yillarda mahallalar infratuzilmasini yanada yaxshilashga oid qarorida belgilangan.
Bu hujjat “Inson qadri uchun” degan ezgu g‘oyaning yana bir ifodasi deyish mumkin. Qaroroga asosan, respublikadagi qariyb 5 300 ta mahallada suv, elektr, gaz ta’minoti va ichki yo‘llar holatini yaxshilash, maktab, bog‘cha kabi qator ijtimoiy obyektlarda qurilish-ta’mirlash ishlari uchun 7 trillion so‘mdan ziyod mablag‘ yo‘naltirilmoqda (2022-yilda – 2,7 trillion so‘m). Shu bilan birga, 6 mingdan ziyod obyektning manzili, moliyalashtirish manbalari aniq belgilab berildi.Avvalroq ushbu majlisda bosh vazir o‘rinbosari, iqtisodiy taraqqiyot va kambag‘allikni qisqartirish vaziri Jamshid Qo‘chqorov joriy yilda aholining ijtimoiy himoyaga muhtoj qismiga davlat budjetidan 2,2 trln so‘mlik bir martalik moddiy yordam ko‘rsatilganini aytgandi.Mamlakat aholisi soni 35,5 milliondan oshadi, respublikadagi jami mahallalar soni esa 9 370 tani tashkil etmoqda. Demak, mazkur vazifalarni amalga oshirish orqali o‘rta hisobda 20 million aholi uchun yanada qulay shart-sharoitlar yaratiladi. Ushbu vazifalarning to‘laqonli va sifatli ijro etilishi ko‘p jihatdan parlament va jamoatchilik ishtirokiga (nazoratiga) bog‘liq.
Mahalliy kengashlar deputatlari va joylardagi senatorlar o‘z saylov okrugi doirasida amalga oshirilishi rejalashtirilgan loyihalar ijrosini qat’iy va manzilli nazoratini yo‘lga qo‘yishlari kerak. Bajarilmayotgan yoki ortda qolayotgan loyihalar yuzasidan mahalliy kengashlarda tanqidiy muhokamalar o‘tkazishlari, respublika darajasigacha masala ko‘tarib chiqishlari lozim.
Tanzila Norboyeva, Senat raisi.
Izoh (0)