Ўзбекистондаги маҳаллалар инфратузилмасини янада яхшилашга 2022 йилда 2 триллион 700 миллиард сўм йўналтирилди. Бу ҳақда Сенат ялпи мажлисида парламент юқори палатаси раиси Танзила Норбоева айтиб ўтди.
Танзила Норбоеванинг таъкидлашича, мазкур йўналишга ажратилаётган маблағлар миқдори президентнинг 2022-2023 йилларда маҳаллалар инфратузилмасини янада яхшилашга оид қарорида белгиланган.
Бу ҳужжат «Инсон қадри учун» деган эзгу ғоянинг яна бир ифодаси дейиш мумкин. Қаророга асосан, республикадаги қарийб 5 300 та маҳаллада сув, электр, газ таъминоти ва ички йўллар ҳолатини яхшилаш, мактаб, боғча каби қатор ижтимоий объектларда қурилиш-таъмирлаш ишлари учун 7 триллион сўмдан зиёд маблағ йўналтирилмоқда (2022 йилда – 2,7 триллион сўм). Шу билан бирга, 6 мингдан зиёд объектнинг манзили, молиялаштириш манбалари аниқ белгилаб берилди.Аввалроқ ушбу мажлисда бош вазир ўринбосари, иқтисодий тараққиёт ва камбағалликни қисқартириш вазири Жамшид Қўчқоров жорий йилда аҳолининг ижтимоий ҳимояга муҳтож қисмига давлат бюджетидан 2,2 трлн сўмлик бир марталик моддий ёрдам кўрсатилганини айтганди.Мамлакат аҳолиси сони 35,5 миллиондан ошади, республикадаги жами маҳаллалар сони эса 9 370 тани ташкил этмоқда. Демак, мазкур вазифаларни амалга ошириш орқали ўрта ҳисобда 20 миллион аҳоли учун янада қулай шарт-шароитлар яратилади. Ушбу вазифаларнинг тўлақонли ва сифатли ижро этилиши кўп жиҳатдан парламент ва жамоатчилик иштирокига (назоратига) боғлиқ.
Маҳаллий кенгашлар депутатлари ва жойлардаги сенаторлар ўз сайлов округи доирасида амалга оширилиши режалаштирилган лойиҳалар ижросини қатъий ва манзилли назоратини йўлга қўйишлари керак. Бажарилмаётган ёки ортда қолаётган лойиҳалар юзасидан маҳаллий кенгашларда танқидий муҳокамалар ўтказишлари, республика даражасигача масала кўтариб чиқишлари лозим.
Танзила Норбоева, Сенат раиси.
Изоҳ (0)