Joriy yilda aholining ijtimoiy himoyaga muhtoj qatlamlariga davlat budjetidan 2 trillion 200 milliard so‘mlik bir martalik moddiy yordam ko‘rsatildi. Bu haqda bugun (18-noyabr) bo‘lib o‘tayotgan Senat yalpi majlisida bosh vazir o‘rinbosari, iqtisodiy taraqqiyot va kambag‘allikni qisqartirish vaziri Jamshid Qo‘chqorov ma’lum qildi, deya xabar bermoqda “Daryo” muxbiri.
Jamshid Qo‘chqorovning ta’kidlashicha, aholining yordamga muhtoj qatlamini qo‘llab-quvvatlash va kambag‘allikni qisqartirish hukumat faoliyatining ustuvor yo‘nalishlaridan biri.
Joriy yilda aholining ijtimoiy himoyaga muhtoj qatlamlariga davlat budjetidan 2 trillion 2 milliard so‘mlik bir martalik moddiy yordam ko‘rsatildi. Yordamga muhtoj oilalarni moddiy qo‘llab-quvvatlash bo‘yicha “Saxovat va ko‘mak” jamg‘armasidan 477 milliard so‘m mablag‘ yo‘naltirildi. Shu bilan birga, 2 million 200 mingta kam ta’minlangan oilalar uchun bolalar nafaqasi tayinlandi. 78 mingdan ortiq oilaga moddiy yordam berildi.Jamshid Qo‘chqorovning qo‘shimcha qilishicha, oliy ta’lim tizimida tahsil olayotgan xotin-qizlarga ham byudjet hisobidan moddiy yordam ko‘rsatilmoqda.
“2022/2023-o‘quv yilida 12 ming 300 nafar xotin-qizlarning kontrakt to‘lovlarini qoplash uchun davlat byudjetidan 68 milliard so‘m mablag‘ yo‘naltirildi. Shuningdek, byudjet mablag‘lari hisobidan tijorat banklari orqali 42 mingdan ortiq talaba xotin-qizlarga kontraktlarini to‘lashga 512 milliard so‘m foizsiz kreditlar ajratildi”, – dedi vazirlik rasmiysi.
Izoh (0)