Zelenskiy Putin to‘g‘ridan to‘g‘ri muzokaralar o‘tkazishni xohlayotganini aytdi
Ukraina prezidenti Vladimir Zelenskiy G‘arb hamkorlaridan Rossiya rahbari Vladimir Putinning to‘g‘ridan to‘g‘ri muzokaralar o‘tkazish istagi haqida signal olganini aytdi. Bu haqda “Interfaks” xabar berdi.
“Putin to‘g‘ridan to‘g‘ri muzokaralar o‘tkazishni xohlayotgani haqida signallar oldim. Men ommaviy shakldagi muzokarani taklif qildim, chunki Rossiya ommaviy urush olib bormoqda”, — dedi Zelenskiy Kiyevda jurnalistlar bilan uchrashuvda.
Bundan tashqari, Ukraina prezidenti 15-noyabr kuni AQSH Markaziy razvedka boshqarmasi (MRB) direktori Uilyam Berns bilan uchrashganini tasdiqladi. Avvalroq Washington Post nashri bu bo‘yicha ma’lumot bergandi.
“Kecha Berns bombadan himoyalovchi boshpanada o‘tirdi. Keyin biz u bilan gaplashdik. Barcha muhim masalalarni muhokama qildik. Biz bir-birimizni bilamiz. U Ukraina tomonida”, — deya qo‘shimcha qildi u.
14-noyabr kuni Berns Anqarada Rossiya Tashqi razvedka xizmati rahbari Sergey Narishkin bilan uchrashgan edi. Uchrashuvda “Rossiya tomonidan yadro quroli qo‘llanilishi oqibatlari” muhokama qilingan.
