Зеленский Путин тўғридан-тўғри музокаралар ўтказишни хоҳлаётганини айтди

Украина президенти Владимир Зеленский Ғарб ҳамкорларидан Россия раҳбари Владимир Путиннинг тўғридан-тўғри музокаралар ўтказиш истаги ҳақида сигнал олганини айтди. Бу ҳақда «Интерфакс» хабар берди.

«Путин тўғридан-тўғри музокаралар ўтказишни хоҳлаётгани ҳақида сигналлар олдим. Мен оммавий шаклдаги музокарани таклиф қилдим, чунки Россия оммавий уруш олиб бормоқда», — деди Зеленский Киевда журналистлар билан учрашувда.

Бундан ташқари, Украина президенти 15 ноябрь куни АҚШ Марказий разведка бошқармаси (МРБ) директори Уильям Бернс билан учрашганини тасдиқлади. Аввалроқ Washington Post нашри бу бўйича маълумот берганди.

«Кеча Бернс бомбадан ҳимояловчи бошпанада ўтирди. Кейин биз у билан гаплашдик. Барча муҳим масалаларни муҳокама қилдик. Биз бир-биримизни биламиз. У Украина томонида», — дея қўшимча қилди у.

14 ноябрь куни Бернс Анқарада Россия Ташқи разведка хизмати раҳбари Сергей Наришкин билан учрашган эди. Учрашувда «Россия томонидан ядро қуроли қўлланилиши оқибатлари» муҳокама қилинган.