«Дарё» нашри 17 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Путин Зеленский билан тўғридан-тўғри музокаралар ўтказмоқчи
Украина президенти Владимир Зеленский Ғарб ҳамкорларидан Россия раҳбари Владимир Путиннинг тўғридан-тўғри музокаралар ўтказиш истаги ҳақида сигнал олганини айтди. Бу ҳақда «Интерфакс» хабар берди.
«Путин тўғридан-тўғри музокаралар ўтказишни хоҳлаётгани ҳақида сигналлар олдим. Мен оммавий шаклдаги музокарани таклиф қилдим, чунки Россия оммавий уруш олиб бормоқда», — деди Зеленский Киевда журналистлар билан учрашувда.
Айни пайтда Россия қўшинларининг Украинага кириши фонида мамлакат ҳукумати давлатни сақлаб қолиш ва ҳарбий хизматчиларнинг руҳини кўтариш мақсадида аҳолини эвакуация қилмади, деб тушунтиради Владимир Зеленский. «Агар Украинада одамлар бўлмаганида, биз давлатимизни қўлдан берган бўлардик», — деган президент.
Унинг айтишича, Киевга биринчи ракета ҳужумидан кейин шаҳарнинг барча аҳолисини эвакуация қилиш, дўконлар, инфратузилмани ёпиш ва электр энергиясини ўчириш таклифи ўртага ташланган. Зарбалар бутун мамлакат бўйлаб берила бошлаганда эса, у Украинанинг барча аҳолисини қаерга эвакуация қилиш мумкинлигини сўраган: «Хўш, қаерга? Польшагами? Словакия? Руминияга? Қаерга?».
Мамлакат президенти ҳарбийлар Украинани сақлаб қолиш учун курашаётганини, Украина эса оилалар ва ердан иборат эканини таъкидлади. «Агар одамлар кетадиган бўлса, кимни ҳимоя қилиш керак бўлади?», — деб сўради у. «Мамлакат президенти: қоч, югур, мен ҳам сен билан қочаман, деса нима бўларди, билмайман»,«Кечирасиз, бу тирик қалқон дегани эмас, йўқ, бу бошқа масала», — дея сўзини тугатган Украина президенти.
Россия Украинага қарийб тўққиз ой аввал, 24 февралга ўтар кечаси бостириб киришни бошлаган эди. Уруш бошланганидан кейин Киев Зеленский мамлакатда «охиригача» қолишини маълум қилди.
АҚШ Хитойнинг ҳарбий соҳада дунёда биринчиликни эгаллашига йўл қўймайди — Пентагон
Ҳозир Хитой АҚШ учун энг катта геосиёсий даъват ҳисобланади, аммо Вашингтон Пекиннинг ҳарбий соҳада дунё бўйича биринчи ўринни эгаллашига йўл қўймайди. Бу ҳақда АҚШ Қуролли кучлари Штаб бошлиқлари бирлашган қўмитаси раиси Марк Милли айтиб ўтди, деб ёзади «Интерфакс».
«Хитойда АҚШ учун аҳамиятли чақириққа айланиш учун салоҳият бор, ва улар, ўз демографияси, технологиялари, иқтисодиёти ва бошқа нарсаларни ҳисобга олганда, аслида аллақачон АҚШ учун энг катта геосиёсий чақириқ ҳисобланади», — деди Милли брифингда.
Бироқ унинг таъкидлашича, АҚШ «Хитой мудофаа соҳасида биздан биринчи ўринни олиб қўйишига йўл бермайди». Хитойликлар «беш йилдан кейин ҳам, ўн йилдан кейин ҳам, ўн беш йилдан кейин ҳам» бунга эриша олмайди, дея қўшиб қўйди у. «АҚШ ҳарбий соҳада ҳозирги пайтда, шубҳасиз, ҳеч қанақа танқидларга қарамасдан, Ер юзидаги энг ҳалокатли ҳарбий машина ҳисобланади», — дея қўшимча қилди Милли.
Шу билан бирга, Милли Хитой ҳарбий соҳада, хусусан, коинот ва кибермаконда фаол ривожланаётганини қайд этди. Аммо унинг сўзларига кўра, «Хитой бунга интилишда давом этса-да, АҚШникидан устунроқ армия ярата олмайди».
«Ўзбекистон биздан 30-40 йил олдинда» — Садир Жапаров
Қирғизистон президенти Садир Жапаров Ўзбекистон тараққиётда республикадан 30-40 йил олдинда эканини айтди. Бу ҳақда Спутник хабар берди.
Жапаровнинг сўзларига кўра, Ўзбекистон томоннинг «боши яхши ишлайди». «Шунинг учун Ўзбекистон биздан 30-40 йил олдинда. Биз эса ҳали ҳам бақиришда (митинг қилишда) давом этмоқдамиз. Мен самолётлар, вертолётлар ҳақида гапирмаяпман, 30 йил ичида биз ҳатто гугурт ишлаб чиқарадиган завод ҳам қурмадик», — деди Садир Жапаров.
Президент нутқи Қирғизистон парламенти ўзбек-қирғиз чегарасининг алоҳида участкаларини белгилаш ҳамда Кампиробод сув омборининг сув ресурсларини биргаликда бошқариш тўғрисидаги келишувни ратификация қилиш фонида янграган.
Парламент депутатларининг 64 нафари келишувни ёқлаб, 19 нафари унга қарши овоз берди. Қирғизистон президент Садир Жапаров ва Миллий хавфсизлик давлат қўмитаси раҳбари Қамчибек Ташиев депутатларни келишувни қўллаб-қувватлашга чақирган. Парламент йиғилиши баҳс-мунозаралар ва тортишувлар билан ўтган.
Ташиев келишувнинг қабул қилиниши билан Қирғизистон ҳудуди қарийб 15 минг гектарга кенгайишини таъкидлади. Шу билан бирга, Кампиробод сув омбори остидаги ерлар Ўзбекистонга ўтказилади.
Эслатиб ўтамиз, январь ойида Қозоғистон президенти Қосим-Жўмарт Тўқаев мамлакат ишбилармон доиралари вакиллари билан учрашувда Ўзбекистонни тилга олганди. «Биз нефть-газ соҳасида СССР давридан буён мавжуд заводларни таъмирлаб келяпмиз. Бу пайтда қўшни Ўзбекистон 3-4 та янги завод қуришнинг уддасидан чиқди», — дея муносабат билдирган Қозоғистон президенти.
Изоҳ (0)