AQSHning O‘zbekistondagi yangi tayinlangan elchisi Jonatan Xennik 17-noyabr kuni Toshkentdagi elchixonada 3 yillik diplomatik faoliyatining yo‘nalishlarini muhokama qilish uchun birinchi matbuot anjumanini o‘tkazdi.
Elchi o‘zining tabrik so‘zida ommaviy axborot vositalari har qanday demokratik davlatning rivojlanishida muhim rol o‘ynashini aytdi.
“O‘zbekistonga qaytib kelganimdan juda xursandman, 1994-1996 yillar oralig‘ida bu yerda o‘zimning birinchi diplomatik vazifamni bajarganman. Mamlakat haqida juda yaxshi xotiralarim bor, lekin aytishim kerakki, u juda o‘zgardi. Rivojlanish va o‘sish noodatiy. O‘zbekiston va munosabatlarimiz qanchalik rivojlanganini ko‘rishdan mamnunman.
Afsuski, O‘zbekistonda mavjud ma’lumotlarning bir qismi siz kabi mustaqil mahalliy professional jurnalistlardan emas, balki boshqa mamlakatlardan kelganiga ishonaman. Ularning hammasi ham ishonchli emas. Shuning uchun biz elchixona sifatida odamlar O‘zbekiston haqida xolis ma’lumotga ega bo‘lishi uchun ko‘proq harakat qilishimiz kerak, deb o‘ylayman. Umid qilamanki, barchangiz auditoriyaga e’lon qilayotgan ma’lumotni tekshirasiz va bu xabar ekaniga ishonch hosil qilish uchun jurnalist sifatidagi vazifangizni bajarasiz”, — deydi elchi.
Jonatan Xennik sarmoyaviy muhit haqida gapirar ekan, O‘zbekiston sayyohlar uchun dunyodagi eng mehmondo‘st davlatlardan biri ekani, biroq qonunchilikni to‘g‘ri yo‘lga qo‘yish, intellektual mulkni himoya qilish bo‘yicha qo‘shimcha chora-tadbirlar ko‘rish, korrupsiyaga qarshi kurashish va davlat ulushiga ega korxonalar sonini cheklash zarurligini aytdi. Shuningdek, elchi AQSHning O‘zbekistondagi asosiy vazifasi iqtisodiy taraqqiyotga ko‘maklashish ekanini ta’kidladi.
Jonatan Xennik 27-iyul kuni AQSHning O‘zbekistondagi yangi elchisi etib tasdiqlangandi. Sobiq elchi Rozenblyum AQSHning Qozog‘istondagi elchisi etib tayinlangan.
Izoh (0)