O‘zbekiston terma jamoasi bosh murabbiyi Srechko Katanes Qozog‘istonga qarshi kechgan o‘rtoqlik o‘yinidan (2:0) keyin o‘z fikrlari bilan o‘rtoqlashdi.
O‘yin haqidaO‘zbekiston terma jamoasining keyingi o‘yini 20-noyabr kuni Rossiya terma jamoasiga qarshi kechadi. Uchrashuv Toshkentdagi “Paxtakor” stadionida 17:00 da boshlanadi.O‘yindan taassurotlarim ijobiy, taktik jihatdan juda yaxshi harakat qildik. Yigitlar hozirgi holatidan kelib chiqib, qo‘ldan kelgancha eng yaxshi o‘yinini ko‘rsatishga harakat qildi. Barcha ko‘rsatmalarni to‘g‘ri bajardi.
Qozog‘istonning o‘yini haqida
Uzr, Qozog‘istonning o‘yini haqida biror fikr bildira olmayman, raqib jamoa o‘yinchilariga baho bermayman. Raqibda 1-2 ta yaxshi imkoniyat bo‘ldi, birinchi bo‘limdagi jarima zarbasida omadimiz kelib, gol o‘tkazmadik.
Raqib jamoa uchun bo‘sh hudud qoldirmadik, shu sabab ularda vaziyatlar kam bo‘ldi. Lekin jamoani xavfli deb ayta olaman.
Futbolchilar ko‘p holda erkin harakat qilgani borasida
Hujum chizig‘idagi futbolchilarga doim erkinlik beramiz, ular istaganicha o‘ynashi, improvizatsiya qilishi mumkin. Lekin himoyadagilar barchasi mas’uliyat bilan harakat qiladi, ularning hammasida o‘z funksiyasi bor.
Himoyamiz Eldor Shomurodovdan boshlanadi, ya’ni u hujumchi sifatida himoyamizni boshlab beradi. Shu bilan birga qanot vakillari ham himoyalanayotgan vaqtimizda yordam beradi, sababi raqib hujumi vaqtida ularda son jihatdan ustunlik bo‘lmasligi kerak.
Masharipovning yo‘qligi o‘yinga ta’sir qilgani haqida
Bugun maydonda harakat qilgan barcha o‘yinchilardan qoniqdim. Doim o‘zimda bor resursdan foydalanishga harakat qilaman. Albatta, Masharipov va Bozorov qaytsa, bizga yaxshi bo‘ladi. Ayniqsa, Jaloliddinning qaytishi jamoani ancha kuchaytiradi.
Shomurodovning “Roma”dagi holati borasida
Unga hech qanday tavsiya berolmayman, men murabbiyman va o‘z ishimni qilaman. Eldor yaxshi darajadagi o‘yinchi, kuchli professional. Bizning eng yaxshi o‘yinchilarimizdan. Oson emas, chunki u “Roma”da ko‘p o‘ynamayapti. Shu bois uning uchun bir chiqqanda 90 daqiqa o‘ynash oson emas.
Namunaga arziydigan o‘yinchi. Uning gollari bo‘lmaganda men allaqachon uyda bo‘lishim mumkin edi. U doimiy o‘yin amaliyoti beradigan jamoa topadi deb o‘ylayman.
Terma jamoada Shomurodov—Sergeyev juftligini o‘ynatish haqida
Bu sizning fikringiz, uni hurmat qilaman. Kelasi o‘yinlarda buni sinab ko‘rishimiz mumkin. Biroq keyingi o‘yin Rossiyaga qarshi bo‘ladi, bu boshqa daraja.
O‘yinchilarni almashtirganim bilan biror jihat yaxshilanib qolmaydi. Ularning hamjihat harakati muhim. Jiddiy mashg‘ulotlarsiz yangi o‘yinchini tarkibga kiritish juda qiyin.
Biz Qozog‘istonga qarshi o‘yingacha bor-yo‘g‘i 20 daqiqa shunday mashg‘ulot o‘tay oldik. Tayyorgarlik ko‘rishga deyarli vaqt bo‘lmadi. Ligada ko‘proq o‘yin amaliyotiga ega bo‘lgan o‘yinchilarni qo‘ydim, ular bir-birini yaxshi tushunadi. 20 daqiqalik mashg‘ulot bilan yangi o‘yinchini maydonga qo‘yib yuborsak, foyda bermaydi, qolgan o‘yinchilarga ham qiyin bo‘ladi.
Albatta, futbolchilar ham charchagan, ularga rahmim keladi, biroq bu kasbimizning bir qismi. Buni to‘g‘ri qabul qilishimiz kerak.
Muxlislarga murojaat
Bu futbolchilar stadionda ko‘p muxlis bo‘lishiga loyiq. O‘zbekiston terma jamoasi o‘ynayapti, axir. Balki ular yuqori darajadagi o‘yinni ko‘rishni xohlar, Germaniya, Angliya, Braziliyaga qarshi... Biroq har qanday vaqtda terma jamoani qo‘llab-quvvatlash kerak, hatto ular yutqazgan vaqtda ham. Chunki terma jamoa o‘ynayapti, bu men uchun emas o‘yinchilar uchun kerak.
Srechko Katanes, O‘zbekiston terma jamoasi bosh murabbiyi
Izoh (0)