Сречко Катанец: «Элдор Шомуродовнинг голлари бўлмаганда аллақачон уйимда бўлишим мумкин эди»

Ўзбекистон терма жамоаси бош мураббийи Сречко Катанец Қозоғистонга қарши кечган ўртоқлик ўйинидан (2:0) кейин ўз фикрлари билан ўртоқлашди.

Ўйин ҳақида

Ўйиндан таассуротларим ижобий, тактик жиҳатдан жуда яхши ҳаракат қилдик. Йигитлар ҳозирги ҳолатидан келиб чиқиб, қўлдан келганча энг яхши ўйинини кўрсатишга ҳаракат қилди. Барча кўрсатмаларни тўғри бажарди.

Қозоғистоннинг ўйини ҳақида

Узр, Қозоғистоннинг ўйини ҳақида бирор фикр билдира олмайман, рақиб жамоа ўйинчиларига баҳо бермайман. Рақибда 1-2 та яхши имконият бўлди, биринчи бўлимдаги жарима зарбасида омадимиз келиб, гол ўтказмадик.

Рақиб жамоа учун бўш ҳудуд қолдирмадик, шу сабаб уларда вазиятлар кам бўлди. Лекин жамоани хавфли деб айта оламан.

Футболчилар кўп ҳолда эркин ҳаракат қилгани борасида

Ҳужум чизиғидаги футболчиларга доим эркинлик берамиз, улар истаганича ўйнаши, импровизация қилиши мумкин. Лекин ҳимоядагилар барчаси масъулият билан ҳаракат қилади, уларнинг ҳаммасида ўз функцияси бор.

Ҳимоямиз Элдор Шомуродовдан бошланади, яъни у ҳужумчи сифатида ҳимоямизни бошлаб беради. Шу билан бирга қанот вакиллари ҳам ҳимояланаётган вақтимизда ёрдам беради, сабаби рақиб ҳужуми вақтида уларда сон жиҳатдан устунлик бўлмаслиги керак.

Машариповнинг йўқлиги ўйинга таъсир қилгани ҳақида

Бугун майдонда ҳаракат қилган барча ўйинчилардан қониқдим. Доим ўзимда бор ресурсдан фойдаланишга ҳаракат қиламан. Албатта, Машарипов ва Бозоров қайтса, бизга яхши бўлади. Айниқса, Жалолиддиннинг қайтиши жамоани анча кучайтиради.

Шомуродовнинг «Рома»даги ҳолати борасида

Унга ҳеч қандай тавсия беролмайман, мен мураббийман ва ўз ишимни қиламан. Элдор яхши даражадаги ўйинчи, кучли профессионал. Бизнинг энг яхши ўйинчиларимиздан. Осон эмас, чунки у «Рома»да кўп ўйнамаяпти. Шу боис унинг учун бир чиққанда 90 дақиқа ўйнаш осон эмас.

Намунага арзийдиган ўйинчи. Унинг голлари бўлмаганда мен аллақачон уйда бўлишим мумкин эди. У доимий ўйин амалиёти берадиган жамоа топади деб ўйлайман.

Терма жамоада Шомуродов—Сергеев жуфтлигини ўйнатиш ҳақида

Бу сизнинг фикрингиз, уни ҳурмат қиламан. Келаси ўйинларда буни синаб кўришимиз мумкин. Бироқ кейинги ўйин Россияга қарши бўлади, бу бошқа даража.

Ўйинчиларни алмаштирганим билан бирор жиҳат яхшиланиб қолмайди. Уларнинг ҳамжиҳат ҳаракати муҳим. Жиддий машғулотларсиз янги ўйинчини таркибга киритиш жуда қийин.

Биз Қозоғистонга қарши ўйингача бор-йўғи 20 дақиқа шундай машғулот ўтай олдик. Тайёргарлик кўришга деярли вақт бўлмади. Лигада кўпроқ ўйин амалиётига эга бўлган ўйинчиларни қўйдим, улар бир-бирини яхши тушунади. 20 дақиқалик машғулот билан янги ўйинчини майдонга қўйиб юборсак, фойда бермайди, қолган ўйинчиларга ҳам қийин бўлади.

Албатта, футболчилар ҳам чарчаган, уларга раҳмим келади, бироқ бу касбимизнинг бир қисми. Буни тўғри қабул қилишимиз керак.

Мухлисларга мурожаат

Бу футболчилар стадионда кўп мухлис бўлишига лойиқ. Ўзбекистон терма жамоаси ўйнаяпти, ахир. Балки улар юқори даражадаги ўйинни кўришни хоҳлар, Германия, Англия, Бразилияга қарши... Бироқ ҳар қандай вақтда терма жамоани қўллаб-қувватлаш керак, ҳатто улар ютқазган вақтда ҳам. Чунки терма жамоа ўйнаяпти, бу мен учун эмас ўйинчилар учун керак.

Сречко Катанец, Ўзбекистон терма жамоаси бош мураббийи