Россияликларнинг хориждаги омонатлари рекорд даражага етгани маълум бўлди

Сентябрь ойида россияликлар хорижий банклардаги омонатларига рекорд миқдорда 6,7 ​​миллиард доллар ўтказди, бу август ойидагига нисбатан чорак баравар кўп. Бу ҳақда «РИА Новости» хабар бермоқда.

Шу билан бирга, йил бошидан буён фуқароларнинг хориждаги омонатлари миқдори икки баробар ортиб, биринчи марта 60 миллиард доллардан ошди.

Жорий йилнинг январь ойи ҳолатига кўра, россияликлар чет эл банкларида қарийб 30,6 миллиард доллар сақлаган. Украинада уруш бошланиши билан фуқаролар хорижга маблағларни фаол ўтказа бошлаган.

Февраль ойида хорижий банкларга 4,3 миллиард долларга яқин маблағ омонатга қўйилди, бу ўша пайтда камида 2018 йилдан бери энг юқори кўрсаткич эди.

Баҳорда мамлакат марказий банки томонидан хорижга пул маблағларини олиб чиқишга чекловлар жорий этилиши фонида бундай операциялар ҳажми сезиларли даражада камайди: март ойида фуқаролар 1,7 миллиард доллар, апрелда 1,4 миллиард доллар, май ойида эса 1,7 долларни депозит қўйган.

Май ойининг ўрталарида регулятор чет элга пул ўтказмалари бўйича чекловларни юмшатди, бунинг натижасида россияликларнинг хорижий банклар фойдасига операциялари ҳажми уч баробарга ошиб, 5,2 миллиард долларга етди.

Июлдан бошлаб россияликлар хорижга бир миллион долларгача пул ўтказишга муваффақ бўлди ва ҳисоб рақамларига 5,6 миллиард доллар ўтказа олди.

Сентябрь ойида эса хорижий омонатларга ўтказмалар рекорд даражага етган — 6,7 миллиард доллар. Натижада россияликларнинг хориждаги омонатлари 9 ой ичида икки баробарга ошиб, 63,1 миллиард долларга етди.

Аввалроқ йил бошидан бери Ўзбекистон банкларида ҳисоб рақами очган россияликлар сони маълум қилингани ҳақида хабар берилганди.