Rossiya armiyasi Xersondan chekinayotgan paytida tergov izolyatoridan 457 nafar mahbusni chiqarib yuborgan. Bu haqda telemarafon efirida Ukraina Milliy politsiyasi raisi Igor Klimenko ma’lum qildi.
Uning aytishicha, qochoqlarning 166 nafari allaqachon topilib, Odessa va Nikolayev viloyatlari hududlaridagi tergov izolyatorlariga yuborilgan.
Hromadske ma’lumotlariga ko‘ra, mahbuslarning barchasi Xerson tergov izolyatori ma’muriyati rossiyalik harbiylar bilan birga evakuatsiya qilinayotganida muassasadan qochib ketgan. Nashr da’vo qilishicha, xodimlardan biri qamoqxona darvozalarini ochib qo‘ygan.
Rossiyaning “Sirena” nashri qochib ketgan mahbuslarning ro‘yxatini e’lon qildi — ular orasida 124 kishi qotillik uchun, 11 kishi jinsiy zo‘ravonlik uchun hukm qilingan.
Rossiya qo‘shinlari Xersondan qachon chekingandi?
9-noyabr kuni Rossiya mudofaa vaziri Sergey Shoygu Rossiyaning Ukrainaga bosqiniga qo‘mondonlik qiluvchi general Sergey Surovikinning taklifi bilan qo‘shinlarni Xersondan Dneprning chap qirg‘og‘iga olib o‘tishni buyurgandi. Ushbu qarorni shaharni to‘liq ta’minlash imkonsizligi va rossiyalik askarlar hayotini saqlab qolishga intilish bilan izohlashdi.11-noyabr kuni ertalab Rossiya Mudofaa vazirligi Xersondan chekinish haqida hisobot berdi. Qayd etilishicha, Dneprning chap qirg‘og‘iga jami 30 mingdan ortiq rossiyalik harbiylar hamda besh mingtaga yaqin qurol-yarog‘ va harbiy texnika olib o‘tilgan. Shu kuniyoq shaharga Ukraina harbiylari kirib keldi.
Xerson Ukrainada 24-fevraldan buyon Rossiya armiyasi tomonidan egallab olingan yagona viloyat markazi edi.
Izoh (0)