Россия армияси Херсондан чекинаётган пайтида тергов изоляторидан 457 нафар маҳбусни чиқариб юборган. Бу ҳақда телемарафон эфирида Украина Миллий полицияси раиси Игорь Клименко маълум қилди.
Унинг айтишича, қочоқларнинг 166 нафари аллақачон топилиб, Одесса ва Николаев вилоятлари ҳудудларидаги тергов изоляторларига юборилган.
Ҳромадске маълумотларига кўра, маҳбусларнинг барчаси Херсон тергов изолятори маъмурияти россиялик ҳарбийлар билан бирга эвакуация қилинаётганида муассасадан қочиб кетган. Нашр даъво қилишича, ходимлардан бири қамоқхона дарвозаларини очиб қўйган.
Россиянинг «Sirena» нашри қочиб кетган маҳбусларнинг рўйхатини эълон қилди — улар орасида 124 киши қотиллик учун, 11 киши жинсий зўравонлик учун ҳукм қилинган.
Россия қўшинлари Херсондан қачон чекинганди?
9 ноябрь куни Россия мудофаа вазири Сергей Шойгу Россиянинг Украинага босқинига қўмондонлик қилувчи генерал Сергей Суровикиннинг таклифи билан қўшинларни Херсондан Днепрнинг чап қирғоғига олиб ўтишни буюрганди. Ушбу қарорни шаҳарни тўлиқ таъминлаш имконсизлиги ва россиялик аскарлар ҳаётини сақлаб қолишга интилиш билан изоҳлашди.11 ноябрь куни эрталаб Россия Мудофаа вазирлиги Херсондан чекиниш ҳақида ҳисобот берди. Қайд этилишича, Днепрнинг чап қирғоғига жами 30 мингдан ортиқ россиялик ҳарбийлар ҳамда беш мингтага яқин қурол-яроғ ва ҳарбий техника олиб ўтилган. Шу куниёқ шаҳарга Украина ҳарбийлари кириб келди.
Херсон Украинада 24 февралдан буён Россия армияси томонидан эгаллаб олинган ягона вилоят маркази эди.
Изоҳ (0)