AQSH sobiq prezidenti Donald Tramp 2024-yilgi Amerika yetakchisi saylovida qatnashishini ma’lum qildi, deb yozadi CNN.
“Amerikani yana buyuk qilish uchun men bugun kechqurun AQSH prezidenti lavozimiga o‘z nomzodimni ilgari suraman”, — dedi Tramp Floridadagi Mar-a-Lago qarorgohida o‘z tarafdorlari qarshisida nutq so‘zlar ekan.
Bundan tashqari, Trampning vakillari saylovlarda qatnashish uchun Federal saylov komissiyasiga hujjatlarni taqdim etgan.
O‘tgan hafta sobiq prezident “katta bayonot” berishini oldindan e’lon qilgan edi. Tramp yaqin orada o‘z saylovoldi kampaniyasini boshlashi haqida Reuters va The Washington Post ham ma’lum qilgandi.
Ayni vaqtda siyosatchining ba’zi ittifoqchilari Kongressga oraliq saylovlar natijalari tufayli, prezident lavozimiga nomzodini qo‘yish haqida e’lon qilishni 6-dekabrga qoldirishga da’vat etgandi. Shu kuni Jorjiyada senatga saylovlarning ikkinchi bosqichi bo‘lib o‘tadi: Tramp tomonidan qo‘llab-quvvatlangan nomzod Gershel Uoker demokrat Rafael Uornokka mag‘lub bo‘lgan, ammo ularning hech biri 50 foiz ovoz to‘play olmagan.
Tramp 2017—2020-yillarda AQSH prezidenti bo‘lgan. 2020-yil yanvarida u amaldagi prezident Jo Baydenga lavozimini bo‘shatib bergan. Tramp o‘z mag‘lubiyatini tan olmagan va saylov natijalarini sud orqali bekor qilmoqchi bo‘lgan. Biroq AQSH Oliy sudi sobiq prezidentning ovoz berish yakunlarini qayta ko‘rib chiqish haqidagi da’vosini rad etgan.
Bayden oktabr boshida 2024-yilgi prezident saylovida Trampni yana mag‘lub etishiga ishonishini aytgandi. Shu bilan birga, amaldagi davlat rahbari saylovda qatnashish haqida qaror qabul qilganicha yo‘q, biroq buni Kongressga saylovlardan keyin hal qilishini aytgan.
Izoh (0)