Moskvaning Sheremetyevo, Domodedovo va Vnukovo aeroportlarida 10-noyabrdan teraktlar amalga oshirilishi xavfining maksimal darajasi joriy etilgan. Bu haqda “Izvestiya” “Rostransnadzor” (Transport sohasidagi nazorat bo‘yicha federal xizmat) aviakompaniyalar va aeroportlarga yuborgan xatga asoslanib xabar berdi. Nashrning yirik aviakompaniyadagi manbasi xat kelib tushganini tasdiqlagan.
“2022-yil 10-noyabr 00:00 dan transport majmuasi faoliyatiga noqonuniy aralashuv bo‘yicha terakt xususiyatiga ega harakat amalga oshirilishi xavfining to‘g‘ridan to‘g‘ri darajasi belgilansin”, — deyiladi hujjatda.
“Rostransnadzor” bildirishicha, endi aeroportlar qo‘shimcha xavfsizlik choralarini qabul qilishi kerak. Sheremetyevo va Domodedovoda maksimal darajadagi himoya joriy etilishini qo‘llab-quvvatlashgan. Vnukovo “Izvestiya” so‘roviga javob berganicha yo‘q.
Bundan tashqari, Sankt-Peterburgning Pulkovo aeroportida xavfsizlikning uchinchi darajasi kiritilgan, deya qo‘shimcha qildi gazeta manbasi. Aeroport vakili bu ma’lumot yuzasidan izoh berishdan bosh tortgan.
Avvalroq “Kommersant” aviatsiya sohasidagi manbalariga tayanib, Markaziy va Janubiy federal okruglardagi Rossiya aviakompaniyalari va aeroportlari har kuni xavfsizlik haqida hisob berishni boshlaganini xabar qilgandi.
Bundan tashqari, Sheremetyevo aeroportida “Nabat” operatsiyalari rejasi bo‘yicha (samolyotni egallab olish ssenariysi) muntazam ravishda mashg‘ulotlar o‘tkazilayotgani aytilgandi. Vnukovoda esa “yong‘in, qo‘poruvchilik va terakt sodir bo‘lishi xavfi yuzaga kelgan taqdirda” A terminalidan evakuatsiya mashq qilingan.
Izoh (0)