O‘zbekiston xalqaro hamjamiyat bilan faol hamkorlik qilishga tayyor va Mintaqaviy iqlim kengashi tashkil etishni taklif qiladi. Bu haqda Oliy Majlis Senati raisi Tanzila Norboyeva Misr Arab Respublikasining Sharm ash-Shayx shahrida BMTning iqlim o‘zgarishi bo‘yicha doiraviy konvensiyasi (COP-27) tomonlarining 27-konferensiyasida aytib o‘tdi.
Norboyeva bu iqlimga moslashish bo‘yicha loyihalarni targ‘ib qilishda, cho‘llanish va yerlarning degradatsiyasiga qarshi kurashishda, suvni tejovchi texnologiyalarni joriy etishda hamkorlik samaradorligini oshirish imkonini berishini qayd etdi.
“O‘zbekistonning asosiy maqsadi — amalga oshirilayotgan tarkibiy islohotlarga “yashil” iqtisodiyot tamoyillarini joriy etish orqali iqtisodiy taraqqiyotga erishishdir. Bu yo‘nalishda iqtisodiyotning barcha sektorlarida ugleroddan kamroq foydalanishga o‘tish va resurslarni tejash, samarali va ekologik toza texnologiyalarni joriy etish ustuvor yo‘nalish hisoblanadi”, — degan u.
Senati raisi birgalikdagi sa’y-harakatlar bilangina oqibatlari Markaziy Osiyoda ham yaqqol kuzatilayotgan iqlim o‘zgarishi muammosiga qarshi turish mumkinligini ta’kidladi.
Parij bitimi doirasida O‘zbekiston 2030-yilgacha YIM birligiga parnik gazlar chiqarishni 35 foizga kamaytirish majburiyatini yana bir bor tasdiqlaydi. Ushbu maqsadlarga erishish uchun qayta tiklanadigan energiya manbalarini joriy etish bo‘yicha keng ko‘lamli dasturlar amalga oshirish boshlandi.
2026-yilga kelib “yashil” energetika ulushini 8 ming MVtga yetkazishni rejalashtirilmoqda, bu esa karbonat angidrid gazi chiqarishni 5 mln tonnaga kamaytirish imkonini beradi. 2030-yilga kelib iqtisodiyotning energiya samaradorligini ikki baravar oshirish, qayta tiklanadigan energiya ulushini esa kamida 25 foizga yetkazish rejalashtirilgan.
Har yili 200 mln tup daraxt va buta ekishni nazarda tutuvchi “Yashil makon” umummilliy loyihasi ko‘p jihatdan respublikada iqlim o‘zgarishi oqibatlarini yumshatishga va ularga moslashishga xizmat qiladi. Loyiha yiliga 200 mln tup daraxt va butalarni ekishni nazarda tutadi. Natijada besh yildan so‘ng shaharlardagi ko‘kalamzor maydonlar hozirgi 8 foizdan 30 foizga oshadi.
Mamlakatda suv resurslaridan samarali foydalanish maqsadida suvni tejovchi texnologiyalarni joriy etgan holda keng ko‘lamli islohotlar amalga oshirilmoqda.
O‘zbekiston Orol dengizi inqirozi bilan bog‘liq muammolarni hal etish bo‘yicha qat’iy choralar ko‘rmoqda. So‘nggi besh yilda Orol dengizining qurigan tubida 1,7 mln gektardan ortiq o‘rmon plantatsiyalari barpo etilgan bo‘lsa, 2026-yilga kelib bu ko‘rsatkich 2,5 mln gektargacha yoki hududning qariyb 80 foizini tashkil etadi. BMT Bosh Assambleyasining maxsus rezolyutsiyasi bilan Orolbo‘yi mintaqasi ekologik innovatsiyalar va texnologiyalar zonasi deb e’lon qilindi.
Keyingi yilda O‘zbekistonda cho‘llanishga qarshi kurashish va yovvoyi hayvonlarning ko‘chib yuruvchi turlarini saqlash bo‘yicha BMTning ikkita yirik tadbirini o‘tkazish rejalashtirilmoqda. Barcha xalqaro hamkorlarni ushbu forumlar ishida faol ishtirok etish taklifi bildirildi.
Izoh (0)