Ўзбекисон адлия вазири лавозимида ишлаб келган Русланбек Давлетов президент маслаҳатчиси бўлди.
Давлат раҳбари матбуот котибининг хабар қилишича, у президентнинг ижтимоий-сиёсий ривожланиш масалалари бўйича маслаҳатчиси лавозимига тайинланди.
Шу муносабат билан адлия вазири лавозимидан озод этилди. Унинг ўрнига ким адлия вазири лавозимини эгаллагани ҳозирча маълум қилинмаган.
Октябрь ойининг ўрталарида Русланбек Давлетов президент маслаҳатчиси этиб тайинланиши, унинг ўрнига Бухоро вилояти прокурори Маҳмуд Истамов адлия вазири бўлиши ҳақида хабарлар тарқалганди. Вазирлик матбуот котиби бунга изоҳ бериб, адлия вазири ўзгармаганини, Русланбек Давлетов ўз иш жойида ўз хизмат вазифасини бажараётганини айтганди.
У Адлия вазирлигига 2017 йилнинг августидан буён раҳбарлик қилиб келаётганди.
Русланбек Давлетов 1980 йилида Хоразм вилоятида туғилган. Маълумоти бўйича ҳуқуқшунос, иқтисодчи. 2001 йил Буюк Британиянинг Варвик университетини, 2003 йилда Жаҳон иқтисодиёти ва дипломатия университетини (магистратура), 2007 йил Тошкент давлат иқтисодиёт университетини ва 2010 йил Президент ҳузуридаги давлат ва жамият қурилиши академиясини тамомлаган.
Меҳнат фаолиятини 2001 йилда Монополиядан чиқариш ва рақобатни ривожлантириш давлат қўмитасида етакчи мутахассис лавозимида бошлаган. Кейинчалик мазкур қўмитада бош мутахассис, бўлим бошлиғи вазифасини бажарувчи бўлиб ишлаган.
2004—2012 йилларда Вазирлар Маҳкамаси Ахборот-таҳлил бошқармаси, Ҳуқуқий экспертиза ва халқаро шартномалар бошқармаси етакчи мутахассиси, бош мутахассиси, 2012—2014 йилларда Олий суд ҳузуридаги Суд қонунчилигини демократлаштириш ва либераллаштириш ҳамда суд тизими мустақиллигини таъминлаш бўйича Тадқиқот маркази директори ўринбосари, директор вазифасини бажарувчиси бўлган.
2014−2016 йилларда Президент девони Олий Мажлис, сиёсий ва жамоат ташкилотлари билан ҳамкорлик қилиш хизмати Олий Мажлиси Сенати ва Қонунчилик палатаси тузилмалари билан фаолиятни мувофиқлаштириш шўъбаси мудири, 2016—2017 йилларда Адлия вазирининг биринчи ўринбосари, 2017 йил 4 январдан 14 августгача Президентнинг жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш бўйича Давлат маслаҳатчисининг 1-ўринбосари лавозимларида фаолият кўрсатган.
Изоҳ (0)