Amazon 10 mingga yaqin ish o‘rinlarini qisqartiradi, aniq raqamlar hali aniqlanmagan. Bu haqda Financial Times xabar bermoqda.
Birinchi navbatda, qisqartirish qurilmalarni ishlab chiqish bilan shug‘ullanadigan bo‘linmalarda, jumladan, Alexa ovozli yordamchisi, kadrlar bo‘limi va chakana savdo bo‘limida amalga oshiriladi.
Xodimlarni ishdan bo‘shatishning ilk to‘lqini shu hafta amalga oshirilishi kutilmoqda. Ma’lumotlarga ko‘ra, ish o‘rinlarini qisqartirish “jamoa bo‘yicha” amalga oshiriladi.
10 minglik qisqartirish kompaniya korporativ xodimlarining taxminan 3 foizini va Amazon’dagi 1,5 million ishchi kuchining 1 foizdan kamini tashkil etadi. Ishdan bo‘shatilayotganlar asosan soatbay faoliyat yuritadigan ishchilardir.
Amazon xodimlarining aksariyati omborlarda va boshqa logistika obyektlarida ishlaydi hamda ularning soni mavsumiy talab bilan o‘zgarib turadi.
Xodimlar soni koronavirus pandemiyasi davrida ikki baravar ko‘paygan bo‘lsa-da, korporativ ishdan bo‘shatishlar kam uchragan. Bu esa kompaniya tarixidagi eng yirik qisqartirish bo‘ladi.
Rejalashtirilgan qisqartirishlar xarajatlarning keskin o‘sishi va savdo o‘sishining sekinlashishi bilan bog‘liq. Amazon’ning bozor kapitallashuvi yil boshidan buyon 42 foizga tushib, taxminan 1 trillion dollarni tashkil qilgan.
Bundan tashqari, investorlar iste’mol xarajatlarining qisqarishi va Amazon’ning COVID 19 pandemiyasi tufayli logistika imkoniyatlarini yo‘qotishidan xavotirda edi. Amazon aksiyalari 14-noyabr, dushanba kuni taxminan 1,4 foizga tushib, 98,86 dollarni tashkil qilgan.
Xodimlarning bir qismini ishdan bo‘shatish to‘g‘risidagi qarorlar AQSHdagi boshqa bir qancha texnologik kompaniyalarda ham qabul qilingan. Xususan, noyabr oyi boshida Twitter xodimlarining yarmi ishdan bo‘shatilgan edi.
Izoh (0)