Компания тарихидаги энг йирик қисқариш: Amazon 10 минг ходимни ишдан бўшатишни режалаштирмоқда

Amazon 10 мингга яқин иш ўринларини қисқартиради, аниқ рақамлар ҳали аниқланмаган. Бу ҳақда Financial Times хабар бермоқда.

Биринчи навбатда, қисқартириш қурилмаларни ишлаб чиқиш билан шуғулланадиган бўлинмаларда, жумладан, Алеха овозли ёрдамчиси, кадрлар бўлими ва чакана савдо бўлимида амалга оширилади.

Ходимларни ишдан бўшатишнинг илк тўлқини шу ҳафта амалга оширилиши кутилмоқда. Маълумотларга кўра, иш ўринларини қисқартириш «жамоа бўйича» амалга оширилади.

10 минглик қисқартириш компания корпоратив ходимларининг тахминан 3 фоизини ва Amazon’даги 1,5 миллион ишчи кучининг 1 фоиздан камини ташкил этади. Ишдан бўшатилаётганлар асосан соатбай фаолият юритадиган ишчилардир.

Amazon ходимларининг аксарияти омборларда ва бошқа логистика объектларида ишлайди ҳамда уларнинг сони мавсумий талаб билан ўзгариб туради.

Ходимлар сони коронавирус пандемияси даврида икки баравар кўпайган бўлса-да, корпоратив ишдан бўшатишлар кам учраган. Бу эса компания тарихидаги энг йирик қисқартириш бўлади.

Режалаштирилган қисқартиришлар харажатларнинг кескин ўсиши ва савдо ўсишининг секинлашиши билан боғлиқ. Amazon’нинг бозор капиталлашуви йил бошидан буён 42 фоизга тушиб, тахминан 1 триллион долларни ташкил қилган.

Бундан ташқари, инвесторлар истеъмол харажатларининг қисқариши ва Amazon’нинг COVID 19 пандемияси туфайли логистика имкониятларини йўқотишидан хавотирда эди. Amazon акциялари 14 ноябрь, душанба куни тахминан 1,4 фоизга тушиб, 98,86 долларни ташкил қилган.

Ходимларнинг бир қисмини ишдан бўшатиш тўғрисидаги қарорлар АҚШдаги бошқа бир қанча технологик компанияларда ҳам қабул қилинган. Хусусан, ноябрь ойи бошида Twitter ходимларининг ярми ишдан бўшатилган эди.