Ijtimoiy tarmoqlarda 13-noyabr kuni “Xorazmda kelin qaynonasini urib qiynadi” nomli sarlavha ostida xabar tarqalgandi. Holat yuzasidan viloyat ichki ishlar boshqarmasi munosabat bildirdi.
Tarqalgan videolavhada bir ayol boshqa bir ayolning bosh qismiga qo‘li bilan urgani, jabrlanuvchi ayol esa bu vaziyatda qarshilik ko‘rsatmagani aks etgan. Mazkur videolavha Xorazm viloyati IIB mas’ul xodimlari tomonidan o‘rganildi.
Unga ko‘ra, videolavhada aks etgan holat Urganch tumani “Shermatlar” mahallasida sodir bo‘lgan. Aniqlanishicha, ushbu xonadonda yashovchi M.J. o‘zaro kelishmovchilik sababli qaynonasi Yo.SH. bilan nizolashib kelgan va qaynonasining betob bo‘lib yotganidan foydalanib, qo‘li bilan bosh qismiga urgan. Ushbu holatni jabrlanuvchining turmush o‘rtog‘i qo‘l telefoni orqali videotasvirga olib, 4-noyabr kuni Urganch tumani IIBga taqdim etgan.
O‘z navbatida, Urganch tumani IIB tomonidan 4-noyabr kuni fuqaro Yo.SH.ga nisbatan sud-tibbiy ekspertizasi tayinlangan, M.J.ning xatti-harakatlari yuzasidan surishtiruv ishlari olib borilmoqda.
Fuqaro Yo.SH.ga nisbatan kelgusida kelini tomonidan zo‘rlik va tazyiq o‘tkazilishining oldini olish maqsadida himoya orderi rasmiylashtirilgan.
Izoh (0)