Namanganda elektr ta’minotida muntazam uzilishlar ro‘y bermoqda va bu holat aholining haqli e’tirozlariga sabab bo‘lmoqda. Bu haqda “Daryo” muxbiri Azizbek Abduvaliyev xabar berdi.
“Elektr ta’minoti korxonasining O‘zAvtodan nima farqi bor?”
Kuz-qish mavsumi kirib kelganidan so‘ng viloyatda elektr energiyasi bo‘yicha murojaatlar ko‘paygani, fuqarolar dispetcherlik xizmatlari yoki Call-markazlarga qo‘ng‘iroq qilib tushishga qiynalayotganidan so‘ng “Namangan hududiy elektr tarmoqlari” korxonasi tomonidan ijtimoiy tarmoqlarda “Namangan elektr ta’minoti” deb nomlangan guruh ochilgan. 7,5 mingga yaqin a’zosi bo‘lgan ushbu guruh viloyatning turli hududlaridan yo‘llangan murojaat, shikoyat va savollarga ko‘milib ketgan.
“11-noyabr Xalqaro elektr energiyasini tejash kuni ekan. Namanganda bu sanani har kuni nishonlayapmiz” deya kinoya qiladi foydalanuvchilardan biri. “Biror hokim yo prokurorning uyida bir soat ‘svet’ bo‘lmasa bormi, nima bo‘ladi?” deya savol yo‘llagan boshqa bir foydalanuvchi.
Chortoq tumanidan yozilgan shikoyatda shunday satrlarni o‘qish mumkin: “Bizda to‘rt soatlab elektr yonmayapti. Eng qizig‘i, atrofimizda beshta sanatoriy bor. Dam olayotganlar respublikaning barcha viloyatlaridan kelishadi. Sharmanda bo‘lyapmiz. Bu ‘svet’ o‘chishining oxiri bormi o‘zi?”
“Nanay qishlog‘ida ‘svet’ni bir kunda 15-marta o‘chirib-yoqishyapti. Nima, qishloqdagilar odam emasmi?” deyiladi Yangiqo‘rg‘on tumanidan yo‘llangan e’tirozda. Yana bir foydalanuvchi esa “Elektr ta’minoti korxonasini O‘zAvtodan nima farqi bor? Sizlar ham oldindan to‘lov qildirib istalgan payt ‘svet’ berasizlar, u ham nari borsa 5 daqiqaga” deya zaharxanda qilgan.
“Gaz bosimi pastligi sababli To‘raqo‘rg‘on IES yetarli quvvat yetkazib bermayapti”
Milliy dispetcherlik markazi Namangan hududiy bo‘limi boshlig‘i Muhammadali Irisqulovning aytishicha, sovuq kunlar boshlanishidan avval viloyatga kuniga 13 million kilovatt-soat elektr energiyasi yetkazib berilgan va ta’minotda deyarli muammo yuzaga kelmagan. Hozirda bu ko‘rsatkich 15,5 million kilovatt-soatga chiqarilgan, biroq ehtiyojni qoplab bo‘lmayapti.
Yana bir muammo To‘raqo‘rg‘on issiqlik elektr stansiyasi bilan bog‘liq. 900 megavatt quvvatga ega stansiya gaz bosimi pastligi sababli 715 megavatt elektr energiyasi beryapti. Kam berilayotgan 185 megavatt esa Namangan shahrining bir kunlik iste’moliga teng.
Mutasaddining ta’kidlashicha, elektr energiyasiga yuklamaning haddan tashqari ortib ketgani natijasida kabel va transformatorlar shikastlanmoqda, elektr simlari erib ketmoqda. Avariya brigadalari esa har bir murojaatning ortidan ulgurishi qiyin bo‘lmoqda, ba’zan endi ta’mirlangan kabel yoki sim oradan hech qancha o‘tmay yana eski holatiga kelmoqda.
Namanganda elektr ta’minotidan nolimaydigan hududlar deyarli yo‘q, lekin ular orasida ham Namangan shahri, Chust va Uychi tumanlarida holat og‘ir ekanligi aytilmoqda.
“Elektr tarmoqlari korxonasidan tortib hatto hokimlikda ham ‘svet’ yo‘q”
Ijtimoiy tarmoq faoli Shukurjon To‘xtasinovning aytishicha, chindan ham Uychi tumani hozirda viloyatdagi elektr ta’minoti bo‘yicha eng muammoli hududlardan biri bo‘lib turibdi. Ahvol shu darajadaki, ba’zan tuman elektr tarmoqlari korxonasi, hatto hokimlikda ham ‘svet’ yo‘q.
Qiziq tomoni, yaqinda Energetika vaziri etib tayinlangan Jo‘rabek Mirzamahmudovning o‘zi ham Namangan viloyatining Uychi tumanidan. Vazirga tuman aholisi nomidan murojaat ham yo‘llangan. Unda shunday deyiladi:
“Vazir etib tayinlanganingizda tuman ahli xursand bo‘lib, o‘z tabriklarini bildirishgan edi. Sizga tuman ahli nomidan energetika tizimidagi mavjud muammolarni tezroq bartaraf etishingizni so‘rab qolamiz. Tumanda gaz yo‘q, elektr energiyasida juda ko‘plab muammolar mavjud. Tuman aholisi qish fasli kelmasidan avval aziyat chekmoqda. Aholi tizimdagi kamchiliklarni tezroq bartaraf etishda amaliy yordam so‘raydi. Murojaatni befarq qoldirmaysiz degan umiddamiz”.
Shukurjonning bildirishicha, bu murojaatga Energetika vazirligi tomonidan darrov munosabat bildirilgan. Hozirda tumanda vazirlikning ishchi guruhi o‘rganish olib bormoqda.
“Masalaning yana bir tomoni bor. Aholi va ijtimoiy muhim obyektlarga tabiiy gaz yetkazib beramiz degan bahona bilan Namangandagi barcha metan gaz zapravkalar 12 soatlik cheklovga o‘tkazildi. Lekin baribir ahvol o‘zgarmadi, aksincha battar bo‘ldi: aholida baribir gaz yo‘q, elektr energiyasida doimiy uzilishlar, ustiga-ustak avtomobillarga gaz to‘ldirish shoxobchalaridagi turnaqator navbatlar”, — deydi Shukurjon To‘xtasinov.
Chindan ham Namanganda elektr energiyasidagi muttasil uzilishlardan jabr ko‘rayotgan toifalar qatoriga qariyalar va bolalar qatori haydovchilarni ham qo‘shsa bo‘ladi: metan gaz zapravkalarida endi navbatlari yetganida ba’zan ‘svet’ o‘chib qoladi, u yerdan eson-omon qutulib chiqqanlarida esa chorrahalarda svetoforlar ishlamayotganligi sababli hosil bo‘lgan uzundan-uzoq tiqinlarga duch kelishadi...
Izoh (0)