Ижтимоий тармоқларда 13 ноябрь куни «Хоразмда келин қайнонасини уриб қийнади» номли сарлавҳа остида хабар тарқалганди. Ҳолат юзасидан вилоят ички ишлар бошқармаси муносабат билдирди.
Тарқалган видеолавҳада бир аёл бошқа бир аёлнинг бош қисмига қўли билан ургани, жабрланувчи аёл эса бу вазиятда қаршилик кўрсатмагани акс этган. Мазкур видеолавҳа Хоразм вилояти ИИБ масъул ходимлари томонидан ўрганилди.
Унга кўра, видеолавҳада акс этган ҳолат Урганч тумани «Шерматлар» маҳалласида содир бўлган. Аниқланишича, ушбу хонадонда яшовчи М.Ж. ўзаро келишмовчилик сабабли қайнонаси Ё.Ш. билан низолашиб келган ва қайнонасининг бетоб бўлиб ётганидан фойдаланиб, қўли билан бош қисмига урган. Ушбу ҳолатни жабрланувчининг турмуш ўртоғи қўл телефони орқали видеотасвирга олиб, 4 ноябрь куни Урганч тумани ИИБга тақдим этган.
Ўз навбатида, Урганч тумани ИИБ томонидан 4 ноябрь куни фуқаро Ё.Ш.га нисбатан суд-тиббий экспертизаси тайинланган, М.Ж.нинг хатти-ҳаракатлари юзасидан суриштирув ишлари олиб борилмоқда.
Фуқаро Ё.Ш.га нисбатан келгусида келини томонидан зўрлик ва тазйиқ ўтказилишининг олдини олиш мақсадида ҳимоя ордери расмийлаштирилган.
Изоҳ (0)