Deyarli har bir ayolning kosmetik sumkasida upa bor va undan foydalanmasdan ko‘chaga chiqmaydi. Biroq ko‘pchilik upani qanday qilib to‘g‘ri ishlatishni bilmaydi va bu bir qarashda ko‘rinadigan darajada oson ish ham emas. “Noviy ochag” nashri upadan foydalanishda yo‘l qo‘yiladigan xatolarni sanab o‘tdi.
Makiyajdan oldin upa surtish
Makiyaj qilishdan oldin yuzga yengil upa surtish kerakligi haqida yanglish fikr bor. Lekin bo‘yanishdan oldin teriga upa surtishning hojati yo‘q. Bu bilan faqat teskari ta’sirga erishish mumkin. Upa qatlami ustidan qilingan makiyaj tufayli teri nafas olmaydi va yuz yaltirab ko‘rinishni boshlaydi. Shuning uchun makiyajdan avval oddiy namlantiruvchi va tonal krem surtish tavsiya etiladi. Upani esa makiyaj yakunida qo‘llash mumkin.
Makiyaj tugaganidan so‘ng darhol upa surtish
Agar suratga tushishdan oldin vizajistlarning qanday ishlashini ko‘rgan bo‘lsangiz, ular makiyajni tugatganidan so‘ng darhol butun yuzga upa surtadi. Ammo professional modellar bo‘yanish uchun maksimal bir necha soat vaqt sarflaydi va shunga qaramay, ularning makiyaji doimiy ravishda tuzatiladi. Vizajistlar ko‘p miqdordagi upani faqat bitta maqsadda — yuz kamera oldida yaltiramasligi uchun ishlatadi. Kundalik makiyajda hammasi boshqacha: upa qatlami barcha kamchiliklarni ta’kidlaydi va kichik mimik ajinlar darhol seziladi. Upani esa bo‘yanishni tugatgandan so‘ng, teri barcha vositalarni qabul qilgandan keyin surtish lozim. Tom ma’noda 5-10 daqiqa kutiladi, keyin yuz salfetka bilan yengil artiladi, bunda ortiqcha tonal mahsulotlari chiqadi. Shundan keyingina upani qo‘llash mumkin.
Terining yog‘li joylariga upa qo‘llash
Kun davomida burun yoki peshona sohasi yog‘ ajralishi tufayli yaltirashi mumkin. Buni aksariyat ayollar upa bilan yashiradi. Yarim soatdan keyin teri yana yaltiraydi. Shundan so‘ng husnbuzarlar qanday paydo bo‘lishiga hayron bo‘lmaslik kerak. Buning uchun dastlab kerakli sohadgi yog‘dan xalos bo‘lish lozim. Albatta, salfetka yoki hech bo‘lmaganda qog‘oz ro‘molcha kerak bo‘ladi. Yuz yaxshilab quritiladi va shundan so‘ng upa surtish mumkin. Effekt bir necha soat davom etadi va teri teshiklarni zararlanmaydi.
Noto‘g‘ri rang upa tanlash
Upaning rangi tonal krem yoki teri rangidan ochroq bo‘lishi kerak. Aynan shu narsa tabiiy ko‘rinish va yuzni yangilash imkonini beradi. Har bir ayol uchun eng yaxshi variant pushti-qaaymoq rang upadir, ammo uni peshona va burunga ehtiyotkorlik bilan qo‘llash kerak. Umuman olganda upalar rangini har kim o‘z terisining rangidan kelib chiqib tanlaydi. Aks holda yosh va go‘zal ko‘rinish uchun surtilgan upa yuzdagi barcha kamchiliklarni yaqqol ko‘rsatib qo‘yishi mumkin. Shuningdek, upani teri rangini oqartirish uchun surtmaslik kerak. Bordi-yu, rang mos kelmasa, go‘yoki yuzga un surtib olgandek tuyiladi.
Upani qo‘llashda yuvilmagan gubkadan foydalanish
Deyarli hamma upani yangilashga ahamiyat bersa-da, ammo uni qo‘llash uchun cho‘tka yoki gubkaga e’tiborsiz bo‘ladi. Ba’zida ular yillar davomida ochiq holatda ishlatiladi. Afsuski, yuz bilan to‘g‘ridan to‘g‘ri aloqaga kirishadigan ushbu vositalar terida yallig‘lanish, toshma va husnbuzarlar toshishiga zamin yaratadi. Vaziyat jiddiylashmasligi uchun upa bilan birgalikda ushbu vositalarni ham vaqti-vaqti bilan yangilash, yuvish va maxsus idish yoki paketlarda saqlash tavsiya etiladi.
Izoh (0)