Namangan viloyati To‘raqo‘rg‘on tumanida kredit mablag‘larini talon-toroj qilish holati aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Qayd etilishicha, Bosh prokuratura huzuridagi departamentining To‘raqo‘rg‘on tumani bo‘limi tomonidan AT “Xalq banki” Namangan viloyati filialining marojaatiga asosan tergovga qadar tekshiruv o‘tkazilgan. Unda, “I.N.” MCHJ rahbari O.T. va jamiyatning norasmiy rahbari T.D. o‘zaro til biriktirib, ushbu bank filialidan avtotransport vositalariga texnik xizmat ko‘rsatishni tashkil qilish uchun ajratilgan 700 million so‘m kreditni “Y.P.” MCHJ hisob raqamiga o‘tkazish orqali kredit mablag‘larini o‘zlashtirish yo‘li bilan talon-toroj qilgani aniqlangan.
Shuningdek, tijorat banki mas’ul shaxslari kredit mablag‘lari hisobidan asbob-uskuna yetkazib berilgani bo‘yicha monitoring tadbirlarini o‘tkazish choralarini ko‘rmagani oqibatida davlat va jamiyat manfaatlariga juda ko‘p miqdorda zarar yetkazgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 205-moddasi (hokimiyat yoki mansab vakolatini suiiste’mol qilish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)